दीपकराज गिरी र दीपाश्री निरौलाको चलचित्र ‘छक्का पञ्जा ४’को दर्शकमाझ लोभलाग्दो हाइप देखिएको छ । 

निर्माण घोषणादेखि नै चर्चामा रहेको चलचित्रको पहिलो गीतले यतिबेला युट्युबमा निकै लोभलाग्दो भ्युज पाइरहेको छ । 

सोमवार बेलुका चलचित्रको पहिलो गीत ‘दर्शन सलाम’ सार्वजनिक गरिएको छ, जसले युट्युबमा राम्रो भ्युज पाइरहेको हो । 

मंगलवार दिउँसोसम्म २० घण्टामै गीतले ७ लाख प्लस भ्युज पाइसकेको छ । 

डेभिड शंकर र सहिमा श्रेष्ठले स्वर दिएको उक्त गीतमा राजेन्द्र थापाको शब्द, दीपक शर्माको संगीत र उदयराज पौडेलको एरेन्ज छ । 

कविराज गहतराजको कोरियोग्राफीमा तयार भिडियोमा साथमा दीपकराज गिरी, दीपाश्री निरौला, केदार प्रसाद घिमिरे, स्वस्तिमा खड्का, राज आचार्य, बुद्धि तामाङ, निर्मल शर्मा लगायतलाई प्रस्तुत गरिएको छ । गीतमा ‘तितोसत्य’का राजको जोडी अभिनेत्री स्वस्तिमा खड्कासँग बाँधिएको छ । 

पछिल्लो समय युट्युबमा चलचित्रको टिजर, ट्रेलर र गीत लगायतको औसत भ्युज घटिरहेको अवस्थामा ‘छक्का पञ्जा ४’ले छोटो समयमै पाएको भ्युज निकै लोभलाग्दो हो । गीत सार्वजनिक भएको केही घण्टामै युट्युब ट्रेन्डिङमा प्रवेश गरेर अगाडि आइरहेको छ । 

यसले चलचित्रप्रति दर्शकको क्रेजलाई समेत अनुमान लगाउन मद्धत गर्छ । दीपकराजकै कथा एवं लेखन रहेको ‘छक्का पञ्जा ४’मा अभिनेत्रीद्धय वेनिशा हमाल र मलिना जोशीको समेत अभिनय छ । 

हेमराज बिसीको निर्देशन रहेको चलचित्र फागुनको १९ गतेबाट प्रदर्शनमा आउँदैछ । राजनीतिक विषयवस्तुमा चलचित्र निर्माण भएको सार्वजनिक पहिलो गीतबाट अनुमान लगाउन सकिन्छ । अभिनेता दीपकराज गिरी अर्थात ‘राजा’ पात्र गाउँले नेताको भूमिकामा छन् । 

केदार घिमिरे र निर्मल शर्मा चलचित्रमा कार्यकारी निर्माताका रुपमा समेत छन् । दिपेन्द्र खनिया र केशव न्यौपाने चलचित्रका निर्माता हुन् ।

आमा सरस्वती मुभिज र आइएमईको प्रस्तुति रहेको चलचित्रमा नरेन्द्र मैनालीको डिओपी, निमेश श्रेष्ठको सम्पादन छ ।