स्टेपिङ स्टोन इंग्लिस बोर्डिङ स्कुलले दीपेन्द्र श्वार मेमोरियल (डीसीए) कप क्रिकेट प्रतियोगिताको उपाधि जितेको छ । फाप्ला क्रिकेट मैदानमा बुधबार सम्पन्न भएको फाइनलमा लिटिल फ्लवार स्कुललाई १० रनले पराजित गर्दै सो स्कूल उपाधि जितेको हो । 

टस जितेर पहिले ब्याटिङ गरेको स्टेपिङले निर्धारित २० ओभरमा ९ विकेट गुमाएर १०९ रन बनाएको थियो । स्टेपिङका लागि किरण धामीले सर्बाधिक ३४ रन बनाएका थिए । २३ बलमा उनले ७ चौका प्रहार गर्न सफल भएका थिए । सोहीअनुसार अभिशेक खड्काले २६ बलमा २३ रन बनाए । उनले एक चौका र एक छक्का प्रहार गरेका थिए । समिर कुँवरले ५ बलमा २ चौकासहित १० रन जोडेका थिए । 

बलिङतर्फ लिटिल फ्लवारका कुशल धामीले ३ तथा आर्यन धनपाली र किरण धामीले समान २–२ विकेट लिएका थिए । जवाफमा लिटिल फ्लवारले निर्धारित २० ओभरमा ९ विकेट गुमाएर ९९ रनमात्रै बनाउन सक्यो । आशिष साहुले २९, सुबोध तिवारीले १३ तथा आरिस बोहराले १२ रन जोडेका थिए । स्टेपिङका अनुराग सिंहले ३ तथा सचिन भट्टले २ विकेट लिएका थिए । 

प्रतियोगिताको विजेता स्टेपिङले ५० हजार नगद प्राप्त गरेको छ । उपविजेता लिटिल फ्लवारले ३० हजार प्राप्त गरेको छ । प्रतियोगिताको सर्वोत्कृष्ट खेलाडी स्टेपिङका कुशल धामी भए । उनले ५ हजार नगदसहित डीसीएमा ४ महिनाको छात्रवृत्ति पाएका छन् । यस्तै, उत्कृष्ट ब्याटर लिटिल फ्लवारका अनुराग सिंह चुनिएका छन् । उनले ३ हजार नगद र ३ महिनाको छात्रवृत्ति पाएका छन् ।

उत्कृष्ट बलर लिटल फ्लवारकै सचिन भट्ट चुनिए । उनले पनि ३ हजार नगद र ३ महिनाको छात्रवृत्ति पाएका छन् । उदीयमान खेलाडीको अवार्ड पनि लिटिल फ्लवारकै रोशन रावलले पाएका छन् । उनले क्रिकेट शुज प्राप्त गरेका छन् ।