गण्डकी प्रदेश सभाको शुक्रवारको बैठकमा ‘विनियोजन ऐन २०७९ लाई संशोधन गर्न बनेको विधेयक’ प्रस्तुत भएको छ । 

प्रदेश सरकारका आर्थिक मामिलामन्त्री सीताकुमारी सुन्दासले विधेयकलाई सभासमक्ष प्रस्तुत गरेका हुन् ।

प्रदेश सरकारले चालू आवको विनियोजित बजेट रकमान्तर गरी खर्च गर्न विधेयक संशाधनको प्रक्रिया अगाडि बढाएको हो । बजेट तथा कार्यक्रमको प्रभावकारी कार्यान्वयनमार्फत पुँजीगत खर्च वृद्धि गर्ने सरकारको लक्ष्य छ ।

विनियोजन ऐन संशोधन विधेयकमाथि आउँदो मंगलवार बस्ने प्रदेशसभा बैठकमा छलफल हुने जनाइएको छ । शुक्रवारको बैठकको शून्य र विशेष समयमा प्रदेशसभा सदस्यले विकास निर्माण र जनजीविकाका सवालमा सरकारको ध्यानाकर्षण गराएका छन् ।

प्रदेशसभा सदस्य लिलबहादुर थापाले प्रदेशको स्वायत्त अधिकारलाई स्थापित गर्नुपर्ने बताए । उनले समृद्ध गण्डकीको लक्ष्य पूरा गर्न साझा योजना र संकल्प चाहिने उल्लेख गरे ।

प्रदेशसभा सदस्य सुधीरकुमार पौडेलले स्याङ्जाका किसानले चिस्यान केन्द्रमा राखेको २९३ टन सुन्तला कुहिएकाले उचित क्षतिपूर्ति दिइनुपर्ने माग राखे । प्रदेशसभा सदस्य प्रकाश बरालले पोखरा अन्तर्राष्ट्रिय विमानस्थलबाट अन्तर्राष्ट्रिय उडानका लागि प्रदेश सरकारले पहल लिनुपर्ने उल्लेख गरे ।