माओवादी केन्द्रले राष्ट्रपतिको चुनावमा सकेसम्म सरकारलाई समर्थन गर्ने सबै दलबीच सहमति गरेर जाने निर्णय गरेको छ ।

स्थायी कमिटी बैठकले राष्ट्रपतिमा सकेसम्म सहमति जुटाउन प्रयत्न गर्ने र नभए विचार, उद्देश्य र लक्ष्य मिल्ने दलसँग मिलेर जाने निर्णय गरेको हो । 

‘अबको दुई महिनाभित्र राष्ट्रपति, उपराष्ट्रपतिमा के–के हुने सबै मिलिसक्छ । राष्ट्रपतिमा हामी सहमतिकै पक्षमा छौं । सहमति भएन, विचार उद्देश्य र लक्ष्य मिल्छ उसैसँग मिलेर अघि बढ्छौँ । राज्यका जिम्मेवारीहरूमा सकेसम्म सहमति जुटाउने, छलफलका लागि खुला छौं’, बैठकपछि माओवादी नेता देवेन्द्र पौडेलले भने, ‘प्रधानमन्त्रीलाई अधिकांश दलले समर्थन गर्नुभएको छ । मिलेर जाऊँ आर्थिक अवस्था कमजोर बनेको यसलाई सुधारौं । अन्तर्राष्ट्रिय सम्बन्ध सुधार्नु छ । यस्तोमा मिलेर जाऊँ भन्नु राम्रो हो।’

एमाले र कांग्रेसलाई बाहिर नराख्ने

पौडेलले एमाले र कांग्रेसलाई बाइपास गरेर जाने पक्षमा आफूहरू नभएको उनले बताए ।

‘हामी नयाँ शिराबाट नयाँ ढंगले छलफल गर्छौ । समर्थन गर्ने सबै दलसँग छलफल गरेर अघि बढ्छौं । एमालेलाई बाहिर राखेर जाऊँ भनेका छैनौं, बाइपास गरेर केही गरौं भनेका छैनौं । एमाले र कांग्रेसजस्ता दलसँगै मिलेर जाऊँ, संविधानको संरक्षण गरौं भनेका हौं । उनीहरूलाई बाहिर राखौं भनेका छैनौं,’ पौडेलले भने ।