चालू आर्थिक वर्ष २०७९/८० को ६ महिनाको अवधिमा पर्सामा ७ हजार ९४१ करदाता थपिएका छन् । 

आन्तरिक राजस्व कार्यालय वीरगञ्जका अनुसार चालू आवको साउनदेखि पुस मसान्तसम्ममा प्यानतर्फ ५ हजार ५९२, आयकरतर्फ १ हजार ६७४, मूल्य अभिवृद्धि करतर्फ ५२२ तथा अन्तःशुल्कतर्फ १३३ करदाता थपिएका छन् ।

यससँगै पर्सामा करदाताको संख्या १ लाख २४ हजार ३०५ पुगेको आन्तरिक राजस्व कार्यालयका सूचना अधिकारी तथा कर अधिकृत सञ्जय सरदार क्षेत्रीले जानकारी दिए । पर्सामा प्यानतर्फ सबैभन्दा बढी ७९ हजार २३, आयकरतर्फ ४० हजार ४१०, मूल्य अभिवृद्धि करतर्फ १० हजार १३६ तथा अन्तःशुल्कतर्फ १ हजार ९५१ करदाता रहेका छन् ।  

यसैबीच बैंक तथा वित्तीय संस्थाले कर्जा प्रवाह नगर्दा चालू आव २०७९/८० को ६ महिनाको अवधिमा आन्तरिक राजस्व कार्यालय वीरगञ्जको राजस्व संकलनमा कमी आएको छ । सो कार्यालयका अनुसार चालू आव २०७९/८० को ६ महिनाको अवधिमा ४ अर्ब ७३ करोड १६ लाख राजस्व संकलन गर्ने लक्ष्य रहेकोमा ६६ दशमलव ६१ प्रतिशत अर्थात् ३ अर्ब १५ करोड १६ लाख मात्र संकलन भएको छ । 

चालू आवको ६ महिनामा अन्तःशुल्कतर्फ १ अर्ब ३१ करोड ९५ लाख २९ हजार, आयकरतर्फ १ अर्ब ४ करोड ८८ लाख ६९ हजार, मूल्य अभिवृद्धिकरतर्फ ७३ करोड ६७ लाख ६६ हजार, ब्याजकरतर्फ २ करोड ४० लाख २३ हजार र घरबहाल करतर्फ २ करोड २४ लाख ९९ हजार राजस्व संकलन भएको सूचना अधिकारी क्षेत्रीले जानकारी दिए ।

बैंक तथा वित्तीय संस्थाले कर्जा प्रवाह नगरेको तथा विभिन्न सामानको आयातमा सरकारले गरेको प्रतिबद्ध लगायतका कारणले राजस्व संकलन घटेको क्षेत्रीको भनाइ छ । आव २०७८/७९ मा कार्यालयले ९ अर्ब ४४ करोड ४५ लाख ७५ हजार राजस्व संकलन गर्ने लक्ष्य लिएकामा लक्ष्यको ९२ दशमलव ३० प्रतिशत अर्थात् ८ अर्ब ७१ करोड ६९ लाख ६० हजार संकलन गरेको थियो ।