दुई वर्षअगाडि मात्रै यती एयरलाइन्सका ५ वटा जेटस्टीम खरिद गरेर सिम्रिक एयरलाइन्सलाई रिब्रान्डिङ गरी सञ्चालनमा आएको गुण एयरलाइन्स आर्थिक संकटमा फसेको छ ।

कर्मचारीलाई तलब समेत दिन नसकेको गुनासो आएको र त्यससम्बन्धमा अनुगमनपछि अनिश्चितकालका लागि उडानमा रोक लगाएको नेपाल नागरिक उड्डयन प्राधिकरणले जानकारी दिएको छ । 

प्राधिरकरणका प्रवक्ता जगन्नाथ निरौलाका अनुसार आर्थिक संकटमा फसेको भन्ने सूचना, पाइलट तथा कर्मचारीलाई तलबभत्ता दिन नसकेकोसहितको गुनासोका आधारमा प्रधिकरणले पाएको थियो ।

त्यसपछि उक्त एयरलाइन्सको अवस्था मूल्यांकन गर्दै उडानमा रोक लगाइएको हो ।

‘एयरलाइन्सले जबसम्म कर्मचारीलाई तलबभत्ता उपलब्ध गराउने र उड्डयन मापदण्डको प्रतिबद्धता पूरा गर्दैन तबसम्म यसको उडानमा लागेको रोक फुकुवा हुँदैन’, निरौलाले भने । 

गुण एयरलाइन्सले भने जहाज विदेशी कम्पनीलाई बिक्री गर्न आवश्यक मूल्यांकनका लागि गत मंगलवारदेखि नै जहाज ग्राउन्डेड गराएको बताएको छ । 

एक विदेशी कम्पनीले गुणका ५ वटै जेटस्टीम लिने तयारी गरेको थियो । त्यसका लागि आवश्यक मूल्यांकन गर्न र उडान आवर नबढाउन जहाज ग्राउन्डेड गरिएको गुण एयरको दाबी छ ।

गुण एयरलाइसका प्रवक्ता तथा वरिष्ठ बजार निर्देशक प्रज्ज्वल थापाका अनुसार दुईवटा बीचक्राफ्ट मेन्टेनेन्समा छन् । बाँकी ५ वटालाई बिक्री गर्ने र नयाँ जहाज ल्याउने उद्देश्यले उडान रोकिएको एयरलाइन्सको दाबी छ ।

अहिले प्राधिकरणले उडान रोकेको भन्ने कुरा साँचो नभएको उनले दाबी गरे । विदेशी कम्पनीले गर्ने मूल्यांकनको समय सकिएकाले अब एकदुई दिनमै उडान शुरू हुने उनको दाबी छ ।

गुण एयरलाइन्सले अहिले भएको जहाज बिक्री गर्ने र एटीआर वा अन्य कुनै कम्पनीको नेपाल सुहाउँदो र बजारको आवश्यकता अनुसारको जहाज ल्याउन खोजिएको जनाएको छ । 

घरजग्गा व्यवसायी राजेन्द्र शाक्यले चलाएको यो वायुसेवा ८ वर्ष अगाडि सिम्रिक एयरलाइन्सलाई बहुमत शेयर बिक्री गरेका थिए । पछि फेरि शाक्यले सिम्रिक एयर किनी गुण एयरलाइन्स बनाएका थिए ।

२ वटा जहाज मात्रै रहेका कम्पनीबाट फिर्ता ल्याउँदा भने शाक्यले यतीका ५ वटा जेटस्टीम खरिद गरेर ७ वटा जहाज बनाएका थिए । गुणले पछिल्लो समय एक अर्ब रुपैयाँभन्दा बढी लगानी गरेको थियो ।

शाक्यले ८ वर्षपछि पुनः गुणकै ब्रान्डमा दुई वर्षअगाडि फिर्ता ल्याएर उडान सुरू गरेको भए पनि फेरि समस्यातर्फ धकेलिएको पाइएको छ ।