पुरानो गठबन्धन ब्युँताउने कसरतमा रहेको नेपाली कांग्रेसले उपराष्ट्रपति जनता समाजवादी पार्टीलाई दिन तयार भएको छ।

अहिलेको सत्ता गठबन्धन फेरिएर पुरानै ५ दलसहित अन्य थप दल समेटेर नयाँ समीकरण बन्ने प्रयास भइरहेका बेला उपराष्ट्रपति जसपालाई दिन कांग्रेस र नेकपा माओवादी केन्द्र तयार रहेका जसपाका एक सांसदले लोकान्तरलाई बताए।

'अहिलेको राजनिक घटनाक्रमअनुसार पहिलेको ५ राजनीतिक दलसहित अन्य दललाई पनि थपेर नयाँ गठबन्धन बनाउने कुरा भइरहेको छ,' ती सांसदले लोकान्तरसँग भने,'नेपाली कांग्रेसले राष्ट्रपति पाउने र जसपाले उपराष्ट्रपति पाउने सम्भावना देखिएको छ।' 

जसपालाई उपराष्ट्रपति दिन कांग्रेस र माओवादी केन्द्रसमेत मानिसकेको उनले खुलाए।

जसपाबाट संसदीय दलका नेता रामसहाय प्रसाद यादवलाई उपराष्ट्रपतिको उम्मेदवार बनाइने पार्टीभित्र समेत तयारी भएको उनले खुलाए। 

यादवले उपराष्ट्रपति जिते, रिक्त हुने बारा-२ मा उपेन्द्र यादव उपनिर्वाचनमा उमेम्दवार हुनेछन्।

उपनिर्वाचनबाट यादव जितेर प्रतिनिधिसभामा सांसद बन्न खोजेका छन्। उपेन्द्र उपनिर्वाचनबाट प्रतिनिधिसभामा सासंद बनेर आउने र उपप्रधानमन्त्री बन्ने उनको चाहनालाई प्रधानमन्त्री पुष्पकमल दाहाल 'प्रचण्ड'ले समेत साथ दिने भनेर आस्श्वस्त पारेका छन्।

उपेन्द्र यस अघि सप्तरी-२ मा जनमत पार्टीका अध्यक्ष डा चन्द्रकान्त (सीके) राउतसँग भारी मतान्तरले पराजित भएका थिए।

त्यसैगरी अहिलेको एमाले-माओवादी सहितको सत्ता गठबन्धन नै कायम रहे पनि जसपाले नै उपराष्ट्रपति पाउने सम्भावना रहेको जसपाका अर्का सांसदले लोकान्तरसँग भने।

'अहिलेकै सत्ता गठबन्धन कायम रहेको अवस्थामा एमालेको राष्ट्रपति उम्मेदवारलाई माओवादीले समर्थन गर्यो भने पनि उपराष्ट्रपति जसपाले नै पाउँछ,' ती सांसदले लोकान्तरसँग भने,'त्यस्तो परिस्थितिमा एमालेले राष्ट्रपति पाउने र माओवादीले आफ्नो भागमा पाउने उपराष्ट्रपति जसपालाई दिन्छ।'

जुनसुकै गठबन्धनबाट राष्ट्रपति पुरुष नै हुने भए पनि फरक समुदायको आधारमा जसपाले उपराष्ट्रपति पाउनु लगभग तय जस्तै देखिएको उनले बताए।

'संविधानमा पनि राष्ट्रपति र उपराष्ट्रपति फरक समुदाय तथा फरक लिंगको हुनुपर्ने भएकाले फरक समुदायको आधारमा जसपाले उपराष्ट्रपति पाउने हो,' ती सांसदले थपे,'मुख्य कुरा हाम्रो अध्यक्षजीको व्यवस्थापनको लागि हामीले उपराष्ट्रपति पाउने हो।'