भारतको राजधानी नयाँ दिल्लीमा शुक्रवार सम्पन्न क्वाड सदस्यहरूको बैठकपछि रुसलाई दण्डहीनताका साथ युद्ध गर्ने अनुमति दिन नहुने भन्दै संयुक्त वक्तव्य जारी गरिएको छ । 

भारत, जापान, अस्ट्रेलिया र अमेरिकाका परराष्ट्रमन्त्रीहरूको संयुक्त बैठकपछि उक्त बयान जारी गरिएको हो । 

युक्रेनमा आणविक हतियारको प्रयोग गर्ने धम्की वा प्रयोग अस्वीकार्य हुने पनि क्वाड समूहले जनाएको छ । फेब्रुअरी महिनाको अन्त्यतिर रुसका राष्ट्रपति भ्लादिमिर पुटिनले अमेरिकासँगको आणविक हतियार नियन्त्रण सन्धि निलम्बन गरेका थिए अनि आणविक परीक्षण पुनः शुरू गर्ने धम्की दिएका थिए । 

‘रुसलाई युक्रेनमा दण्डहीनताका साथ काम गर्न दिइरहने हो भने संसारभरिका आक्रान्ताहरूलाई युद्ध शुरू गरे पनि केही सजाय भोग्नुपर्दैन भनी सन्देश जानेछ,’ अमेरिकाका परराष्ट्रमन्त्री एन्टोनी ब्लिन्केनले बताए । 

ब्लिन्केनले जी२० बैठकको साइडलाइनमा क्वाडका अन्य सदस्यहरूसँग भेटघाट गरेका थिए । जी२० बैठकमा मन्त्रीहरूले द्वन्द्वका लागि एकअर्कालाई दोष दिएका थिए । 

बिहीवार दिल्लीमा ब्लिन्केनले रुसका परराष्ट्रमन्त्री सर्गे लाभरोभलाई भेटेका थिए । युक्रेन युद्ध शुरू भएयता अमेरिकी र रुसी परराष्ट्रमन्त्रीबीच पहिलोपटक भेटघाट भएको हो । 

लाभरोध र ब्लिन्केनबीच १० मिनेटभन्दा कम समय कुराकानी भएको रुसका समाचार संस्थाहरूले खबर दिए ।