शाङ्हाईका कम्युनिस्ट पार्टी प्रमुख ली छ्याङ चीनका नयाँ प्रधानमन्त्री नियुक्त हुने भएका छन् । 

गत अक्टोबर महिनामा ग्रेट हल अफ द पिपुलको मञ्चमा लीले राष्ट्रपति सी चिनपिङसँगै कदम राखेपछि उनलाई पोलिटब्युरो स्थायी कमिटीमा दोस्रो स्थानमा राखिएको प्रस्ट भएको थियो । 

बहालवाला प्रधानमन्त्री ली खछ्याङले राजनीतिबाट संन्इास लिने घोषणा गरिसकेका छन् । 

सन् २०२२ मा चीनमा जिरो कोभिड नीतिका विरुद्ध प्रदर्शन चर्किंदा ली छ्याङले त्यसको राम्रो व्यवस्थापन गरेका थिए । उनले लिएका कतिपय महत्त्वपूर्ण निर्णयका कारण परिस्थिति काबुबाहिर जान पाएको थिएन । 

त्यसभन्दा अघि पनि लीले आफ्नो कुशल कार्यशैलीका कारण राष्ट्रपति सीको मन जितिसकेका थिए । कोरोनाकालमा उनले शाङ्हाईमा लकडाउनको राम्रा व्यवस्थापन गरेका थिए । त्यसैको पुरस्कार स्वरूप उनलाई प्रधानमन्त्री बनाइन लागेको हो । 

शनिवारबाट चीनको संसद्का दुवै सदनको सत्र (टु सेसन्स) शुरू हुँदैछ । कुल १५ दिन चल्ने यी सत्रकै क्रममा लीलाई प्रधानमन्त्री घोषणा गरिनेछ । 

ली छ्याङसँग राष्ट्रपति सीको पुरानो सम्बन्ध छ । सी चच्याङ प्रान्तमा पार्टीको प्रमुख हुँदा ली उनका चीफ अफ स्टाफ थिए । 

सी राष्ट्रपति बनेपछि लीलाई चच्याङका गभर्नर अनि पछि च्याङुसु प्रान्तका पार्टी सचिवका रूपमा बढुवा गरिएको थियो ।