राष्ट्रपतिको निर्वाचन आज बिहीबार हुँदैछ । चौथो कार्यकालका लागि हुन गइरहेको निर्वाचनमा नेपाली कांग्रेसका वरिष्ठ नेता रामचन्द्र पौडेल र नेकपा (एमाले) का उपाध्यक्ष सुवासचन्द्र नेम्वाङ प्रतिस्पर्धामा रहेका छन् । 

नयाँ बानेश्वरस्थित संघीय संसद भवनमा हुने निर्वाचनमा आज विहान १० बजेदेखि ३ बजेसम्म मतदान हुने निर्वाचन आयोग अधिकृतको कार्यालयले जनाएको छ । नतिजा आजै सार्वजनिक गर्ने आयोगको भनाइ छ । आज ७ बजेसम्म निर्वाचनको नतिजा सार्वजनिक भएपछि मुलुकले चौथो कार्यकालका लागि तेस्रो राष्ट्रपति प्राप्त गर्नेछ । 

निर्वाचनमा ८८२ मतदाताले भाग लिने आयोगले सार्वजनिक गरेको मतदाता नामावलीमा जनाइएको छ । कांग्रेसबाट उमेदवार रहेका वरिष्ठ नेता पौडेललाई आठ दलीय गठबन्धनको समर्थन छ । 

कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा), जनमत पार्टी, लोकतान्त्रिक समाजवादी पार्टी (लोसपा), नागरिक उन्मुक्ति पार्टी, राष्ट्रिय जनमोर्चाले नेता पौडेललाई समर्थन गरेका छन् । 

एमाले उम्मेदवार नेम्वाङलाई भने अन्य दलले अहिलेसम्म समर्थन गर्ने जनाइसकेका छैनन् । राप्रपाले हिजो तटस्थ बस्ने निर्णय गरेको थियो । राष्ट्रपतिका दुवै उम्मेदवार अनुभवि र यसअघि प्रतिनिधिसभाको सभामुखको जिम्मेवारी निर्वाह गरिसकेका छन् । नेता पौडेल २०५१ सालको संसद्मा सभामुख भएका थिए । नेता नेम्वाङ २०६४ र २०७० को संविधान सभाको  अध्यक्षको जिम्मेवारी पनि निर्वाह गरेका थिए । उनी पुनः  २०६३ मा पुनर्स्थापित संसद्को पनि सभामुखको जिम्मेवारी निर्वाह गरेका थिए ।  राष्ट्रपति निर्वाचनमा संघीय संसद र प्रदेश सभाका सांसादले मतदान गर्नेछन् ।