रुसले युक्रेनको राजधानी किएभका साथै खार्किभ र ओडेसामा समेत क्षेप्यास्त्र आक्रमण गरेपछि ती ठाउँहरूमा विद्युत् आपूर्ति अवरुद्ध भएको छ । 

किएभका मेयर भिताली क्लित्स्कोले शहरको दक्षिणी भागमा विस्फोट भएको अनि लगभग १५ प्रतिशत घरहरूमा बिजुली नरहेको बताए । 

युक्रेनको ऊर्जा सञ्चालक डीटीएकेको किएभ डिभिजनले शत्रुको आक्रमणका कारण आकस्मिक विद्युत् सेवा प्रवाह गरिएको जनाएको छ । 

खार्किभमा रुस सीमानजिक १५ वटा आक्रमण गरिएको त्यहाँका गभर्नर ओलेग सिनेगुबोभले बताएका छन् । 

खार्किभको प्रमुख शहरका मेयर इगोर तेरेखोभले ऊर्जा पूर्वाधारलाई तारो बनाइएको अनि शहरका केही भागमा विद्युत् आपूर्तिमा समस्या आइरहेको बताएका छन् । 

ओडेसा क्षेत्रका गभर्नर माक्सिम मार्चेन्कोले पनि ऊर्जा संरचनामा विशाल संख्यामा क्षेप्यास्त्र प्रहार गरिएको र आवासीय भवनहरूमा क्षति पुर्‍याइएको बताएका छन् ।