नेपालले २०२० फेब्रुअरी २५ मा कीर्तिपुरमा ओमानसँग हारबाट शुरू गरेको आईसीसी विश्वकप लिग २ लाई कीर्तिपुरमै यूएईविरुद्ध चामत्कारिक जीत दर्ता गर्दै टुंग्याएको छ ।

अविश्वसनीय जीतपछि नेपालले ४ वर्षलाई एकदिवसीय मान्यतालाई मात्रै लम्ब्याएको छैन, जिम्बाबेमा एकदिवसीय छनोटका लागि आईसीसी सुपर लिगको बटम ५ भित्र रहने टिमसँग खेल्ने पक्का गरेको छ। 

बटम ५ मा वेस्ट इण्डिज, दक्षिण अफ्रिका, श्रीलंका आयरल्यान्ड, आयरल्यान्डस्मध्येकै देश हुनेछन् । यिनैमध्ये र आयोजक जिम्बावेसहित बलिया देशसँग नेपालले एक दिवसीय छनोट खेल्नेछ । लिग २ बाट नेपालसँगै गएका स्कटल्यान्ड र ओमानले पनि खेल्नेछन् ।

अविश्वसनीय कमब्याक गरेको नेपालले लगातार जित्दै कमजोर सधैंको ब्याटिङको तनावलाई पर छोड्दै सकारात्मक सन्देश दिएको छ ।

किनकि प्रत्येक खेलमा एउटा होइन ओपनर, मध्यपंक्ति र तल्लो तहले पनि सम्हालिएर ब्याटिङको नमुना यसपटक देखाएको छ । यतिमात्रै होइन नेपालले जतिसुकै रनको पहाड चढ्नुपर्ने भए पनि धैर्यतापूर्वक ब्याटिङ गर्दा असम्भव केही नहुने रहेछ भन्ने पनि यसैपटक देखाएको छ । 

७ राष्ट्र सम्मिलित एकदिवसीय विश्वकप छनोटको खेलसमेत रहेको यो खेलमा कीर्तिपुरदेखि कीर्तिपुरसम्म आइपुग्दा नेपालले मध्यम, कमजोर र नाटकीय प्रदर्शनको उतारचढाव बेहोर्‍यो । 

शुरूआतका १२ खेलमा ६ जितेर नेपालले मध्यम प्रदर्शन गरेको थियो । तर बीचको १२ खेलमा २ जीतसहित ६ अंकमात्रै बटुल्दा नेपाल २४ खेलमा पुग्दा दयनीय अवस्थामा पुग्यो । 

यसैले ७ टिममध्ये अन्तिम २ मा मात्रै रहेको नेपाललाई सीधै एकदिवसीय विश्वकप छनोट खेल्न सपनाजस्तो देखिएको थियो। 

मुस्किलले प्राप्त गरेको एकदिवसीय मान्यता जोगाउन पनि कठिन देखियो । किनकि अंकको पहाड नाघेर नामिबिया, अमेरिका, यूएई जित्दै स्कटल्यान्ड र ओमान पछाडि पुग्नुपर्ने थियो । बाँकी १२ खेलमा कम्तीमा १० वा ११ खेल नजित्दासम्म नेपालको सपना जतिखेर पनि धर्मराउन सक्ने थियो ।

शुरूका १२ खेलः मध्यम प्रदर्शन

डिभिजन २ का शुरूवाती १२ खेलमा नेपालको अवस्था मध्यम थियो । १२ मध्ये ६ वटामा जीत र ६ वटामा पराजय बेहोर्न पुगेको थियो । नेपाले अमेरिकाविरुद्ध ३ खेल जित्दा १ खेल हार्‍यो। ओमानसँग ३ खेलमा पराजित हुँदा १ खेल जित्यो । पीएनजीविरुद्ध २ जीत दर्ता गर्दा यूएईविरुद्ध नेपालले २ खेल नै हार्‍यो।

बीचका १२ खेलः कमजोर प्रदर्शन

शुरुवातका १२ खेलमा ५० प्रतिशत नतिजा निकालेको नेपालले बीचका १२ खेलमा भने दयनीय प्रदर्शन गर्‍यो । 

नेपालमा सिरिज हुनु अघिका १२ खेलमा २ जीत एउटा बराबरी र एउटा नतिजा नआउँदा नेपालले ८ खेलमा पराजय बेहोरेको थियो । नेपालले स्कटल्यान्ड र ओमानविरुद्ध मात्रै जित निकालेको थियो ।

अमेरिकासँगको खेल बराबरी हुँदा नामिबियासँगको खेलमा नतिजा नै आएन । नेपालले नामिबियालाई १९८ रनको लक्ष्य दिएको थियो । तर जवाफी ब्याटिङमा उत्रिएको नामिबियाले ४ रन बनाएपछि वर्षाले खेल बिथोल्यो ।

यस क्रममा नेपालले स्कटल्यान्ड र नामिबियासँग ३-३ खेलमा पराजय बेहोर्‍यो । ओमान र अमेरिकासँग पनि १-१ खेलमा पराजय बेहोर्न पुग्यो ।

शुरूका १२ खेलमा १२ अंक जोडेको नेपालले थप १२ खेलबाट २ जीत, एक बराबरी र १ नतिजा नआएको खेलबाट ४ गरी ६ अंकमात्रै बटुल्यो । २४ खेलबाट १८ अंकमा रहँदै नेपाल ७ मध्ये अन्तिम २ पुग्यो । 

यसैले नेपालका लागि बाँकी १२ खेलमा अविश्वसनीय कमब्याक गर्नुको विकल्प थिएन । यी १२ खेलमध्ये घरेलु मैदानमा २ र यूएईमा १ सिरिज थिए । यसैले यी सिरिज नेपालको क्रिकेट जीवनका लागि अति नै महत्वपूर्ण थिए । चामत्कारिक र सनसनीपूर्ण प्रदर्शनको विकल्प नेपालसँग थिएन ।

खेल नम्बर १ 

कीर्तिपुरमा सिरिजअन्तर्गत स्कटल्यान्ड, नामिबिया र नेपाल भिडेका थिए । नेपालले पहिलो खेलमा नामिबियाविरुद्ध टस जितेर पहिले फिल्डिङ रोजेको थियो । करण केसीले ५ र सन्दीप लामिछानेले ३ विकेट लिएको खेलमा नेपालले चुनौतीपूर्ण २८६ रनको लक्ष्य पायो । 

तर कुशल मल्लले ११५ को शतकीय पारी र कप्तान रोहित पौडेलले ७२ रनको महत्वपूर्ण योगदान गरेपछि नेपालले ४७.४ ओभरमा ८ विकेट गुमाएर २ विकेटको जित दर्ता गर्‍यो । छिटो जित्ने धुनमा नेपालले लगातारजस्तो तीन विकेट गुमाएपछि साँघुरो जित दर्ता गरेको थियो । 

खेल नम्बर २ 

दोस्रो खेलमा स्कटल्यान्डविरुद्ध नेपालले टस जितेर फेरि फिल्डिङ रोज्यो । सन्दीप लामिछानेको ३ र कुशल मल्लले २ विकेट लिएको खेलमा स्कटल्यान्डले पूरै ५० ओभरमा २७५ रनको लक्ष्य दियो । जवाफी ब्याटिङमा उत्रिएको नेपालले ४७ ओभरमा ७ विकेट क्षतिमा २७५ रन बनाउँदा खेल ३ विकेट जित्यो ।

नेपालको जितका लागि दीपेन्द्रसिंह ऐरीले ८५ र कुशल मल्लले ८१ रनको महत्वपूर्ण पारी खेले ।

खेल नम्बर ३

लगातार २ खेलमा जीत दर्ता गरेको नेपाललाई एकदिवसीय मान्यता जोगाउन र छनोटमा पुग्न निरन्तर जीत आवश्यक थियो । तेस्रो खेलमा नेपालले नामिबियाविरुद्ध टस जितेर फेरि फिल्डिङ नै रोज्यो । सन्दीप लामिछानेले ३ विकेट लिनुबाहेक अरू बलरले प्रभावशाली प्रदर्शन गर्न नसकेपछि नामिबियाले ५० ओभर खेल्दै ६ विकेटको क्षतिमा २७५ रनको लक्ष्य दियो ।

जवाफी ब्याटिङमा उत्रिएको नेपालका लागि आशिफ शेखले ८१, ज्ञानेन्द्र मल्लले ६५, कुशल मल्लले ६२ र कप्तान रोहित पौडेलले ३९ रनको योगदान गरे । चार खेलाडीले सम्मानजक रन बनाएपछि नेपालले ४७.३ ओभरमा ७ विकेट गुमाएर ३ विकेटको जीत हात पार्‍यो । 

खेल नम्बर ४

गृह मैदानमा भएको सिरिजअन्तर्गत चौथो खेलमा नेपालले फेरि स्कटल्यान्डविरुद्ध टस जितेर फिल्डिङ नै रोज्यो । सन्दीप लामिछानेले ४ र करण केसीले ३ विकेट लिएको खेलमा स्कटल्यान्डले ४६.१ ओभरमा अलआउट हुँदै नेपाललाई २१३ रनको सामान्य लक्ष्य दियो ।

सामान्य लक्ष्य पछ्याएको नेपालको लागि रोहित पौडेलले नटआउट ९५, करण केसीले ३१ र ज्ञानेन्द्र मल्लले २१ रन बनाए । ४४.१ ओभरमा ८ विकेट गुमाएर नेपालले लक्ष्य हासिल गर्‍यो । यसरी नेपालले घरमै भएको सिरिजका ४ वटै खेल आफ्नो पक्षमा पारेर महत्वपूर्ण ८ अंक जोड्न पुग्यो ।

यूएईमा यूएईसँगै पपुवा न्युगिनीसँग खेल्नुअघि नेपाल लगातार चार जीतले उच्च मनोबलमा देखियो । नेपालको सिरिजमा कप्तान रोहित पौडेलले सानदार ब्याटिङ गरे । रोहितले चार खेलमा क्रमशः ७२, ६, ३९ र ९५ रनको महत्वपूर्ण पारी खेले ।

खेल नम्बर ५

नेपालमा ४ खेल जितेको नेपालले यूएईमा पपुवा न्युगिनीविरुद्धको खेलमा पनि टस जितेर पहिले फिल्डिङ रोज्यो । गुल्सन झाले ३ र कुशल मल्लले २ विकेट लिएको खेलमा पीएनजीले २०४ रनको मात्रै लक्ष्य दियो । जवाफी ब्याटिङमा उत्रिएको नेपालका लागि कुशल भुर्तेलले ५६, आशिफ शेखले ४४, आरिफ शेखले ३३ र दीपेन्द्रसिंह ऐरीले २२ रन बनाएपछि ४५.२ ओभरमा ४ विकेटको जीत निकाल्यो ।

सन्दीप लामिछाने सहभागी नभएको खेलमा नेपालले जीत संख्या लगातार ५ मा पुग्यो।

खेल नम्बर ६

यूएईविरुद्ध नेपालले टस जितेर पहिले फिल्डिङ रोज्यो । बलरले सोचेअनुसारकै उत्कृष्ट प्रदर्शन गरेपछि यूएईले ५० ओभरमा ८ विकेट गुमाएर २०७ रन मात्रै बनायो । नेपालका लागि सन्दीपले ३ विकेट लिए । अरू बलरले पनि किफायती बलिङ गर्दा नेपालले सामान्य लक्ष्य पायो । तर सामान्य लक्ष्य पछ्याएको नेपालका लागि कुशल मल्लले ६० रन बनाउनुबाहेक अरू खेलाडीका रूपमा उच्च रन नै आशिफ शेखको १७ रन हुन पुग्यो ।

३१.५ ओभरमै नेपाल अलआउट हुँदा ६८ रनले पराजित हुन पुग्यो । लगातारका ५ खेलमा विजयी हुँदै आएको नेपालको विजयीयात्रा रोकिन पुग्यो । 

खेल नम्बर ७

नेपालविरुद्ध यूएईमा पीएनजीले टस जितेर पहिले ब्याटिङ रोज्यो । सोमपाल कामी र दीपेन्द्रसिंह ऐरीले २-२ विकेट लिएको खेलमा अन्य बलरले पनि किफायती बलिङ गरे । जसको परिणाम ४९.२ ओभरमा अलआउट हुँदै पीएनजीले मात्र १८० रनको लक्ष्य दियो । 

सामान्य लक्ष्य पछ्याएको नेपालका लागि आशिफ शेखले ८६ रनको योगदान गरे । तर अरू अग्रपंक्ति र मध्यपंक्ति धर्मराएपछि नेपालले सामान्य लक्ष्य पनि पूरा नगर्ने हो कि भन्ने स्थिति देखा पर्‍यो । कुशल मल्ल र सन्दीप लामिछानेले शेखलाई साथ दिएपछि नेपालले ४८ ओभरमा ७ विकेट गुमाएर खेल जित्यो ।

खेल नम्बर ८ 

यूएईमा भएको सिरिजको अन्तिम खेलमा आयोजकविरुद्ध नेपालले टस जितेर ब्याटिङ रोज्यो ।

नेपालका लागि भीम सार्कीले ७०, आरिफ शेखले ४३, कुशल मल्लले ३२ र सन्दीप लामिछानेले १७ रनको योगदान गरेपछि नेपालले यूएईलाई २३० रनको लक्ष्य दियो । अग्रपंक्तिका आशिफ खानले ८२ र आर्यन लाक्राले ५० रन  बनाए तर टिमको हार टार्न सकेनन् ।

नेपाली बलरले एकपछि अर्को विकेट लिएपछि ४५ ओभरमा १८७ रनमै अलआउट हुँदा नेपालले ४२ रनले खेल जित्यो । नेपालका लागि सोमपाल कामी र दीपेन्द्रसिंह ऐरीले ३-३ विकेट लिएपछि नेपालले सनसनीपूर्ण जित निकाल्यो । 

यो ट्राई सिरिजका ४ खेलमा नेपालले ३ वटामा जित हात पारेपछि ३२ खेलबाट ३२ नै अंक जोड्यो । अब घरेलु मैदानमा नेपालको यूएई र पीएनजीविरुद्ध नै अन्तिम सिरिज बाँकी थियो । यो सिरिजका ४ खेल जिते नेपालले एकदिवसीय विश्वकपको ग्लोबल क्लालिफायर सीधै खेल्न सक्थ्यो । 

खेल नम्बर ९

विदेश भूमिमा पनि प्रभावशाली प्रदर्शन गरेको नेपाललाई जित्ने बानी नै भइसकेको थियो । यसैले नेपाली टिम उत्साही थियो । पहिलो लक्ष्य दुई खेल जितेर एक दिवसीय मान्यता जोगाउने र दोस्रो सबै खेल जितेर नामिबियालाई पछाडि पार्दै लिग २ का ७ टिममा शीर्ष ३ मा पर्ने लक्ष्य नेपालको थियो । 

नेपालमा भएको सिरिजको पहिलो खेलमा पीएनजीले टस जितेर पहिले नेपाललाई ब्याटिङमा बोलायो । घरेलु मैदानको फाइदा उठाउँदै आशिफ शेखले ११० रनको शतकीय पारी खेल्दा अर्का ओपनर कुशल भुर्तेलले ४५ रन बनाए ।

भीम सार्कीले ४४ र रोहित पौडेलले ३० रन बनाएपछि ४९.१ ओभरमा अलआउट हुँदै नेपालले २९८ रनको लक्ष्य दियो ।

चुनौतीपूर्ण लक्ष्य पछ्याएको पीएनजी ४७.१ ओभरमा २४५ रनमा रोकिएपछि नेपालले ५२ रनले गृह मैदानमा महत्वपूर्ण सिरिजको पहिलो खेल जित्यो । नेपालका लागि सन्दीपले ४ र दीपेन्द्रले २ विकेट लिए । अब बाँकी तीन खेलको जीतले नेपालको महत्वपूर्ण यात्रा गर्ने थियो । 

१० औं नम्बरको खेल 

१० औं खेल नेपाल र यूएई दुवैका लागि महत्वपूर्ण थियो । एकदिवसीय टिकिरहन यूएईलाई पनि यो खेल जित्नुपर्ने थियो । नेपालको भने जीतले पक्का हुन्थ्यो ।

टस जितेर नेपालले हजारौं दर्शकअघि पहिले ब्याटिङ गर्‍यो । अग्रपंक्तिका खेलाडी नचलेको खेलमा मध्यपंक्तिले सम्माजनक २४८ रन बनायो । यस क्रममा रोहितले ७७, आरिफले ४३, गुल्सन झाले ३७ र दीपेन्द्रले ३४ रन बनाए । 

जवाफी ब्याटिङमा उत्रिएको यूएई नेपाली ब्याटरसामु शुरूबाटै निरीह बन्न पुग्यो । ८ रन जोड्दासम्म ४ विकेट गुमाएको यूएई अन्ततः २२ं५ ओभरमा ७१ रनमा अलआउट भएपछि नेपालले विशाल १७७ रनको फराकिलो जित हात पार्‍यो ।

नेपाललाई फराकिलो जित दिलाउन ललित राजवंशीले ५ र सन्दीपले २ विकेट लिए । अब बाँकी दुई खेलमा जित निकाल्न सक्दा नेपाल अविश्सनीय यात्रामा अघि बढ्ने बाटोतिर लाग्यो ।

खेल नम्बर ११ 

११ औं खेलमा टस जितेर पीएनजीविरुद्ध नेपालले पहिले फिल्डिङ रोज्यो । सन्दीपले ५, कुशल मल्ल र ललितले २-२ विकेट लिएपछि पीएनजी ३२ ओभरमै खुम्चियो। जम्मा ९५ रनमै अलआउट भयो ।

जवाफमा नेपालका आशिफले ५३, कुशल भुर्तेतलले ३३ बनाएपछि नेपालले ७.३ ओभरमै १०० रन बनाएर ९ विकेटको फराकिलो जीत दर्ता गर्‍यो । एक खेल अगाडिको यो फराकिलो जीतले नेपालको आत्मविश्वास निक्कै बलियो बन्न पुग्यो ।

१२ औं खेल

अब नेपाल आफ्नै मैदानमा भएको सिरिजमा निर्णायक खेल जित्न सके सीधै ग्लोबल क्वालिफायरमा पुग्ने थियो ।

अन्तिम ११ खेलमा १० मा जित निकालेको नेपालको मनोबल उच्च भएको थियो । यसैले बिहीबार कीर्तिपुरमा फेरि अर्को जीत निकाल्दै सनसनी मच्चाउने दाउमा नेपाल थियो ।

३० हजारभन्दा बढी घरेलु समर्थक उपस्थित हुने खेल जितेर नेपाल विश्व क्रिकेटलाई सन्देश पनि दिन चाहन्थ्यो । खेलमा टस जितेर यूएईले पहिले ब्याटिङ रोज्यो । नेपाललाई शर्मनाक हार चखाउन सक्दा रनरेटका आधारमा अमेरिकालाई पछाडि छोड्दै यूएईले एक दिवसीय मान्यता जोगाउन पनि सक्थ्यो ।

यसैले उसले नेपालविरुद्ध अघिल्लो खेलमा बेहोरेको शर्मनाक पराजयको हिसाबकिताब पनि गर्ने र अमेरिकालाई पनि उछिन्ने नीति लियो । 

पहिलो ब्याटिङमा उत्रिएको यूएईका लागि आशिफ खानले ४२ बलमा कीर्तिमानी १०१ रनको पारी खेले । विर्त्या अरविन्दले ९४ र मोहम्मद वासिमले ६३ रन बनाएपछि नेपालले ३११ रनको विशाल लक्ष्य पायो ।

नेपालविरुद्ध अन्तिम ५ ओभरमा मात्रै यूएईले ९१ रन जोडेको थियो।

लक्ष्यको पहाड एकातिर तेर्सिँदा लगातार जीतको लय भने नेपालसँग थियो । यसैले नेपालले शुरूआतमै विकेट गुमाए पनि हार मानेन ।

कुशल भुर्तेल, भीम सार्की, आरिफ शेख र गुल्सन झाले अर्धशतकीय पारी खेलेपछि नेपाल जीततर्फ लम्कियो । तर कमजोर प्रकाशका कारण ४४ ओभर मात्रै सम्भव भएको खेलमा नेपाल डिएल मेथडबाट ९ रनले निर्णायक खेल जित्दै ग्लोबल क्वालिफायरमा पुग्यो ।

अन्तिम खेलमा चामत्कारिक जीतपछि नेपाल ४० अंकसहित नामिबियालाई उछिन्न सफल भएको हो । अन्तिम खेलमा दर्शकले मैदानमा देखाएको उल्लास र उपस्थितिले पनि एशोसियट क्रिकेटमा नेपाल अब्बल र अग्रणी रहेको सन्देश विश्व क्रिकेटलाई दिन सफल भयो ।

नेपाल देशाई आएपछिका १२ मध्ये ११ खेल जित निकाल्दै विश्व क्रिकेटमै सनसनी र चर्चा बटुल्न सफल भयो। 

मोन्टीले ल्याएको मोमेन्टम 

बाँकी १२ खेलमा शतप्रतिशत जस्तो नतिजा ल्याउन सके मात्रै नेपालको शीर्ष ३ मा पर्ने सम्भावना थियो ।

यतिमात्रै होइन आफूले जितेर मात्रै पनि नहुने तर अर्को टिमको नतिजा पनि आफूअनुकूल आउनुपर्थ्यो । एक हप्ता लगत्तै नेपालले स्कटल्यान्ड र नामिबियासँग घरेलु मैदानमा डिभिजन २ अन्तर्गत ट्राइ सिरिज खेल्नुपर्ने चुनौतीमा नेपाल थियो ।

नेपालको बलियो पक्ष सधैं बलिङ हुने गर्थ्यो । तर मोन्टी प्रशिक्षकको रूपमा आएपछि नेपालले ब्याटिङमा अस्वाभाविक नमुना नै पेश गर्‍यो ।

0अघिपछि चौका र छक्का हान्ने धुनमा खराब सट खेल्ने खेलाडी यसपटकका पछिल्ला खेलमा हौसिएको देखिएन । बरु स्ट्राइकट रोटेट गर्दै रन बटुल्ने र खराब बलमा बाउन्ड्री लगाउने धैर्यता खेलाडीले देखाए ।

नियमित स्ट्राइक रोटेट गर्दा प्रतिओभर ४-५ रन आउने र बाउन्ड्री लाग्दा रनरेट बढ्ने भएपछि नेपालको ब्याटिङमा यसपटक निक्कै राम्रो सन्तुलन देखियो ।

यतिमात्रै होइन आशिफ, रोहित, कुशल भुर्तेल, दीपेन्द्र, कुशल मल्ल, भीम, गुल्सनस्ता खेलाडीले यसपटक ब्याटिङमा परेको बेलामा आफूलाई प्रमाणित गरे ।

टिममा स्थान बनाएका सन्दीपले पनि महत्वपूर्ण अवस्थामा विकेट लिने र रनमा समेत साथ दिए ।

त्यस्तै नेपालको स्पीन आक्रमणमा यसपटक ललितले आफूलाई प्रमाणित गरे। अन्तिम खेलमा ३११ रनको पहाड चढ्नसमेत नेपाल तयार हुँदै अघि बढ्नु र चार खेलाडीले एउटै खेलमा अर्धशतक हान्नु मोन्टीले ल्याएको मोमेन्टम हो ।

यसलाई कायम राखेर नेपालललाई अब बलिया देशसँग खेलेर आफूलाई थप निखार्नुपर्ने चुनौती आएको छ ।

को हुन् मोन्टी देशाई ?

भारतका लागि एक टेस्ट र एक एक दिवसीय क्रिकेट खेलेका देशाईसँग धेरै देशको टिमलाई प्रशिक्षण दिएको अनुभव छ । 

देशाई फेब्रअरी ६ मा नेपालको प्रशिक्षक नियुक्त भएका थिए । देशाईले २०१८ मा अफगानिस्तान र २०१९ मा यूएईको ब्याटिङ कोच भएर काम गरेका थिए ।

उनले २०१९ मा क्यानडाले लिग २ खेल्दा मुख्य प्रशिक्षकको भूकिा निभाएका थिए ।

लगत्तै उनले दुई वर्ष वेस्ट इण्डिजको ब्याटिङ कोच भएरसमेत काम गरे । देशाई २०१५ र २०१७ मा पनि नेपाली क्रिकेटसँग जोडिएका थिए । देशाईले कुनै समय भारतको आइपीएलमा राजस्थान रोयल्सको हेडकोच भएरसमेत काम गरेका थिए ।