जनमत पार्टीका अध्यक्ष डा. चन्द्रकान्त (सीके) राउतले आफ्नो पार्टीले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिने बताएका छन् ।

प्रधानमन्त्री प्रचण्डले विश्वासको मत लिनेसम्बन्धी प्रस्तावमाथिको छलफलमा सोमवार भाग लिँदै राउतले संघीयता पुनःस्थापित गर्न प्रचण्डले महत्त्वपूर्ण भूमिका खेलेको बताए ।

नेपालमा बाइसे चौबीसे राज्य भनेको संघीयता नै रहेको तर्क गर्दै राउतले पछिल्लो समय यसलाई पुनः स्थापित गर्न प्रधानमन्त्री प्रचण्डले महत्त्वपूर्ण भूमिका खेलेको बताए ।

उनले यसलाई बचाउन पनि प्रचण्डको भूमिका महत्त्वपूर्ण हुने बताए ।

सरकारसँग आफ्ना केही असन्तुष्टि रहे पनि त्यसलाई मध्यनजर गरेर सरकार अघि बढ्ने विश्वास समेत उनले व्यक्त गरे ।

‘हामीले उहाँलाई विश्वासको मत दिने निर्णय गरेका छौं । केही असन्तुष्टिहरू हामीसँग छन्, तर त्यसलाई समाधान गर्न सकिन्छ । सानो कुरामा विश्वासको मत फिर्ता लिनुपर्छ भन्ने छैन,’ राउतले भने ।