प्रधानमन्त्री पुष्पकमल दाहालले आफ्नो कार्यकालमा दलित समुदायको लागि विशेष कार्यक्रम घोषणा हुने बताएका छन्। 

मंगलवार ५८ औँ अन्तर्राष्ट्रिय जातीय भेदभाव उन्मुलन दिवस(२१ मार्च)को सन्दर्भमा काठमाडौंमा आयोजित सार्वजनिक समारोह कार्यक्रममा दलित समुदायका लागि विशेष कार्यक्रम घोषणा हुने बताए।

उनले आफ्नो यो कार्यकालमा दलित समुदायले सयौँ वर्षसम्म सम्झनेगरी केही कार्यक्रम घोषणा गर्ने प्रतिबद्धता व्यक्त गरे।

उनले दलित समुदायका माग र मुद्दाहरूको सम्बोधन अहिलेको परिस्थितिमा आफूले बाहेक अरूले गर्न नसक्ने पनि बताए। 

उनले भने, ‘अहिले भर्खरै पर्शुरामजीले २० सूत्रीय माग भनेर जे राख्नुभएको छ, मलाई लाग्छ, नेपालको आजको मितिमा, म सधैँ भन्दिनँ, आजको दिनमा मैले गर्न सके त्यो अगाडि जान्छ । अरूले गर्ने स्थिति मैले देखेको छैन । त्यसकारण म तपाईंहरूको अगाडि आजको यो ऐतिहासिक दिनमा के घोषणा गर्न चाहन्छु भने मेरो यो कार्यकालमा दलितहरूले भविष्यसम्म, सयौँ वर्षसम्म सम्झिनेगरी केही घोषणा म गर्दैछु । म गर्नेछु । यो विश्वास र प्रतिबद्धता म तपाईहरूको अगाडि व्यक्त गर्न चाहन्छु ।’

प्रचण्डले दलित समुदायको हक र अधिकारको निम्ति सिंगो राज्य र राज्यका निकायहरू जिम्मेवारपूर्ण हुनुपर्नेमा सरकार स्पष्ट रहेको बताए।

उनले दलित समुदायको विकास र उन्नतिका लागि राज्यले क्षतिपूर्तिसहितको विशेषाधिकार दिनुपर्ने र सकारात्मक विभेदको प्रक्रियाबाट मात्रै राजनीतिक, आर्थिक, सामाजिक र सांस्कृतिक समानताको आधारशिला खडा गर्न सकिने बताए। 

उक्त कार्यक्रम अगाडि प्रचण्डविरुद्ध' नाराबाजी भएको थियो। 

समारोहमा जाँदै गर्दा तीन जना युवाले प्रधानमन्त्रीविरुद्ध नाराबाजी गरेका थिए। यस क्रममा उनीहरूले  'गरिबमारा प्रचण्ड मुर्दावाद', 'मूल्यवृद्धि खारेज गर','नालायक सरकार होसियार','युवालाई मार्न पाइँदैन, यस्तो सरकार चाहिँदैन','७७ जिल्लाका युवा एक हौं' भन्दै नारा लगाएका थिए।