सत्तारुढ नेकपा (माओवादी केन्द्र) ले पार्टीभित्र प्रशिक्षक उत्पादनका लागि प्रशिक्षण कार्यक्रम चलाइरहेको छ ।

माओवादी केन्द्रको केन्द्रीय स्कुल विभागको आयोजनामा पार्टी केन्द्रीय कार्यालय पेरिसडाँडाँमा मंगलवार(हिजो)देखि ‘केन्द्रीय प्रशिक्षक प्रशिक्षण कार्यक्रम’ चलिरहेको छ ।

यस कार्यक्रममार्फत जिल्ला जिल्लामा पार्टीको प्रशिक्षक उत्पादन गर्न लागिएको जनाइएको छ ।

प्रशिक्षण कार्यक्रममा प्रत्येक जिल्लाबाट १ जना, प्रत्येक प्रदेशबाट २-२ जना, जनवर्गीय संगठनका केन्द्रीय अध्यक्षहरू र केन्द्रीय स्कुल विभागका सदस्यको उपस्थिति छ । ११ गतेसम्म चल्ने प्रशिक्षणमा माओवादी केन्द्रका शीर्ष नेता तथा विषयविज्ञहरूले प्रशिक्षण दिने पार्टीका उपमहासचिव गिरिराजमणि पोखरेलले जानकारी दिए। 

स्कुल विभागले तय गरेअनुरूप पाठ्यक्रममा आधारित भएर २६ वटा कक्षा प्रशिक्षार्थीलाई दिइने उनले बताए। 

उपमहासचिव तथा केन्द्रीय स्कुल विभागका संयोजक पोखरेलले पार्टीको विचारधारात्मक स्तर निकै कमजोर हुँदै गएकोले यस किसिमको प्रशिक्षण आवश्यक परेको बताए। उनले प्रशिक्षणबाट आलोचनात्मक चेत भएको मान्छे उत्पादन गर्ने, कार्यकर्तालाई जनसमुदायसँग गाँसिएको सेवक बनाउन खोजिएको बताए।  

उनले भने, ‘हामीले महशुस गरेको कुराचाहिँ हाम्रो विचारधारात्मक स्तर निकै कमजोर भएर गएको छ । हिजो एउटा समयमा हामी स्कुलिङको कामलाई, विचारधाराको कामलाई धेरै ठूलो महत्व दिन्थ्यौँ । अहिले १५ वर्ष भएछ हाम्रो पार्टी स्कुल नचलेको । आज नेपालको कम्युनिष्ट आन्दोलनमा दक्षिणपन्थी विचार बोलवाला हुँदै गएका छन् । विर्सजनवादी विचारहरु देखापर्दै गएका छन् । हामीले विचारधारात्मक कामहरुलाई हामीले छोड्यौँ । अब हामी मध्यमस्तरीय पढाइ हुँदै अगाडि जान खोजिराखेका छौँ ।'

प्रशिक्षकहरु उत्पादन गर्ने यो कार्यक्रम भएको उनले बताए। भने, 'विचार रिचार्ज गरिराख्नुपर्छ अनि मात्र मान्छे सशक्त हुन्छ । आफूलाई मजबुत बनाउँदछ । हामीले आलोचनात्मक चेत भएको मान्छे पनि बनाउन खोजेका हौँ । जनसमुदायसँग गाँसिएको सेवक पनि बनाउन खोजेका हौँ ।’

नेकपा(माओवादी केन्द्र)का केन्द्रीय सदस्य कुमार पौडेलले पार्टी नेता, कार्यकर्ताहरुलाई वैचारिक रुपमा अध्ययन गराउन प्रशिक्षणको जरुरी परेको बताए। उनले पार्टीको सिद्धान्त, नीति, कार्यक्रम, मार्क्सवाद, लेनिनवाद र माओवादका आधारभूत सिद्धान्तहरू जनता र कार्यकर्ताहरुमा एकरूपताका साथ लैजान प्रशिक्षण चाहिने उल्लेख गरे।