अनलाइन माध्यमबाट भेटिएका युवायुवतीले विवाह गरे तर उनको वैवाहिक जीवन धेरै टिक्न सकेन । आइसल्यान्डमा भएको घटनामा सम्बन्धविच्छेदपछि महिलाले पुरुषलाई लगातार धम्की दिन थालिन् ।

ती महिलाले पूर्व पतिलाई म्यासेज पठाउँदै जीवन बर्बाद गरिने, ज्यान मार्ने र बलात्कार मुद्दामा फसाउने धम्की दिइन् । अन्तर्राष्ट्रिय सञ्चारमाध्यमका अनुसार ४० वर्षीया महिला केरेन बटरवर्थले पूर्व पतिलाई विभिन्न आरोप लगाइन् ।

सन् २०२० मा दुवै जना नजिकिएका थिए । विवाहबन्धनमा आएको केही समयमै दुवैको सम्बन्धविच्छेद भयो । सम्बन्धविच्छेदपछि पनि महिलाले म्यासेज पठाउन छाडिनन्, कार्यालय समयमा फोन गरेर हैरान गर्न थालिन् ।

म्यासेज गरेर बलात्कार मुद्दामा फसाउने धम्की दिएपछि घटना अदालतसम्म पुग्यो । स्थानीय अदालतले ती महिलाको व्यवहारलाई अनुचित ठहर गर्दै व्यवहार सुधार्न चेतावनी दिएको छ । महिलाले व्यवहार नसुधारे अदालतले जेल पठाउनसक्ने समेत बताइएको छ । ती महिलालाई मनोपरामर्श सेवा दिन पनि अदालतले आदेश गरेको छ ।