बौद्धनाथ क्षेत्रमा बढ्न थाले बाह्य पर्यटक

विश्व सम्पदा सूचीमा सूचीकृत बौद्धनाथ क्षेत्रमा बाह्य पर्यटक बढ्न थालेका छन् ।

आर्थिक वर्ष २०७७/७८ मा यस क्षेत्रमा दक्षिण एसियाली देशका १ हजार ५४४ र अन्य देशका १ हजार २५६ पर्यटक आएका थिए ।

कोरोना महामारीका कारण त्यस आर्थिक वर्षमा पर्यटक कम आएका थिए । धेरै समय बन्दाबन्दी (लकडाउन) गरिएकाले कम पर्यटक आएका हुन् ।

यो संख्या आव २०७८/७९ मा बौद्ध क्षेत्रमा घुम्न आउने पर्यटक केही बढेका थिए । त्यस वर्ष दक्षिण एसियाली देशका ६५ हजार ८३१ र अन्य देशका ३० हजार १०९ पर्यटक आएको बौद्धनाथ क्षेत्र विकास समितिका कार्यकारी निर्देशक शान्तिमाया तामाङले जानकारी दिए ।
 
पर्यटकको संख्या चालू आर्थिक वर्षको ८ महिनामै १ लाख ३६ हजार ९३६ पुगेको उनले बताए । जसमा दक्षिण एसियाली देशका ६९ हजार ८३४ र अन्य देशका ६७ हजार ९२ रहेका छन् ।

समितिले पर्यटक आकर्षित गर्न यस क्षेत्रको सफाइमा विशेष ध्यान दिएको जनाएको छ । सफाइका लागि निजी क्षेत्रको गजुरमुखी सेक्युरिटी कम्पनीसँग सम्झौता गरिएको छ । 

कम्पनीका ६ जना कर्मचारीले दैनिक बौद्ध क्षेत्रमा सफाइ गर्ने छन् । जसका लागि समितिले वार्षिक रूपमा १७ लाख ३९ हजार ३१४ शुल्क दिने जनाइएको छ ।