‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
नयाँ समीकरण बनेसँगै प्रतिनिधिसभाबाट पुनः विश्वासको मत जितेका प्रधानमन्त्री पुष्पकमल दाहाल प्रचण्डले मन्त्रिपरिषद् विस्तारमा ढिलाइ गरेका छन् । प्रचण्डले चैत  ६ मा संसदबाट विश्वासको मत जितेपछि मन्त्रिपरिषद्लाई पूर्णता दिन दलहरुसँग छलफल गर्दै आएपनि सहमति भने जुट्न नसकेको हो । भागबण्डामा मुख्यगरी कांग्रेससहितका साझेदार दलसँग सहमति नजुट्दा मन्त्रिपरिषद् पुनर्गठन प्रभावित बन्न पुगेको छ । 

प्रधानमन्त्रीले बुधबार सत्ता गठबन्धन र शुक्रबार कांग्रेसका नेताहरुसँग छलफल गरेका थिए । यस्तै प्रचण्डले गठबन्धनमा आबद्ध अन्य दलसँग पनि छुट्टाछुट्टै वा सामुहिक छलफल गर्ने योजना बनाएका छन् । सबैसँग छलफलपछि सत्ता गठबन्धनको बैठक पुनः बसेर सहमति जुटाउन प्रयास गर्ने प्रधानमन्त्रीको सचिवालयले जनाएको छ । यसो गर्दा मन्त्रिपरिषद् विस्तारमा १–२ दिन लाग्न सक्ने प्रचण्डको सचिवालयको भनाइ छ । मुख्यगरी अर्थ, गृह, परराष्ट्र जस्ता मन्त्रालय कसले लिने भन्नेमा सत्ता साझेदार दलमा विवाद रहेको छ ।  

प्रधानमन्त्रीले यसअघि संसदबाट विश्वासको मत जितेपछि सञ्चारकर्मीहरुलाई प्रतिक्रिया दिँदै चैत १० भित्र मन्त्रिपरिषद्लाई पूर्णता दिने बताएका थिए ।
००००
लोकतान्त्रिक समाजवादी पार्टी, नेपाल (लोसपा)ले सत्ता गठबन्धनका दलहरुलाई सरकारमा सम्मानजनक सहभागिता गराउनुपर्ने बताएको छ । बिहीवार पार्टी केन्द्रिय कार्यालयमा बसेको पार्टीको केन्द्रिय कार्यकारिणी समितिको बैठकपछि सञ्चारकर्मीहरुसँग कुरा गर्दै पार्टीका वरिष्ठ नेता शरदसिंह भण्डारीले सरकारमा सहभागी हुने दलहरुलाई सम्मानजनक सहभागिता गराउनुपर्ने बताएका हुन् ।

यसैगरी नेकपा एकीकृत समाजवादी पार्टीले पनि सरकारमा सहभागी हुने र त्यसका लागि पार्टीको तर्फबाट कार्यदल बनाइएको छ । यस्तै कांग्रेसले सरकारमा सहभागी हुने भनेर यसअघि नै निर्णय गरिसकेको छ । 
यसैगरी राष्ट्रिय स्वतन्त्र पार्टीले  गत पुस  १० गतेकै सहमति कार्यान्वयन भए  पार्टी सरकारमा जानसक्ने  बताएको छ । प्रवक्ता मुकुल ढकालले १० गतेकँ सहमति कार्यान्वयन भएमा सरकारमा जान सक्ने बताए । रास्वपाले पनि प्रचण्डलाई विश्वासको मत दिएको थियो ।
००००
सञ्चार तथा सूचना प्रविधिमन्त्री रेखा शर्माले प्रधानमन्त्री पुष्पकमल दाहाल प्रचण्डको भारत भ्रमण वैशाख दोस्रो साताभित्र भइसक्ने बताएकी छन् । बिहीवार भारतको दिल्लीमा आयोजित एक कार्यक्रमपछि उनले यस्तो जानकारी गराएकी  हुन् ।

मन्त्री शर्माले प्रधानमन्त्री दाहालले पहिलो विदेश भ्रमण भारतबाट नै शुरु गर्ने र अप्रिल महिनासम्ममा भ्रमण भइसक्ने जानकारी आफूले भारत सरकारलाई दिएको बताइन् ।
००००
मन्त्रिपरिषद्को बैठक शुक्रबार बस्दैछ । शुक्रबार दिउँसो बस्ने तय भएको बैठकले नेपाल प्रहरीको नयाँ आईजीपी नियुक्त गर्ने तयारी छ । वर्तमान आईजीपी धिरज प्रताप सिंह शनिवारदेखि अवकाशमा जाने भएसँगै नयाँ नियुक्ति गर्न लागिएको हो ।
००००
नेपाली कांग्रेसका नेता एवं प्रतिनिधिसभा सदस्य डा चन्द्रकान्त भण्डारीको स्वास्थ्यमा सुधार हुँदै गएको छ ।
गत फागुन ३ गते काठमाडौँको बुद्धनगरस्थित आफ्नै घरमा ग्यास पड्किएर गम्भीर घाइते भएपछि भारतको मुम्बईस्थित नेशनल वर्न सेन्टरमा फागुन ४ गतेदेखि उपचाररत कांग्रेस नेता डा भण्डारीको स्वास्थ्यमा सुधार हुँदै गएको हो ।
००००
नेपालमा कोरोना भाइरसको सङ्क्रमण बिहीबार ह्वात्तै बढेको छ । शून्यमा झरेको सङ्क्रमण बिहीबार एकै दिन १७ जनामा देखिएको हो । स्वास्थ्य तथा जनसङ्ख्या मन्त्रालयका अनुसार एक हजार चार सय ५४ जनामा गरिएको परीक्षणमा १७ जनामा सङ्क्रमण देखिएको छ ।
००००
शिक्षक सेवा आयोगले प्राथमिक तहको शिक्षक पदका लागि खुला प्रतियोगितात्मक परीक्षाको विज्ञापन खुलाएको छ। आयोगले बिहीबार ७७ वटै जिल्लाका लागि ६ हजार १३ जना प्रावि शिक्षक संख्या कोटा खुलाएको हो।
००००
नेकपा एमालेका महासचिव शंकर पोखरेलले १० दलीय  गठबन्धनलाई खण्डित गर्ने रणनीतिमा एमाले नलाग्ने बताएका छन् ।

प्रेस चौतारी नेपाल दाङले आयोजना गरेको पत्रकार सम्मेलनमा उनले नेकपा माओवादी केन्द्रलाई लक्षित गर्दै भने, ‘चुनाव लड्दा कांग्रेससँग मिलेर लड्नुभयो । जनतालाई दिएको वचन पूरा गर्नेतर्फ फर्किनुभएको हो ठीक छ ।’
००००
नेकपा माओवादी केन्द्रले लुम्बिनी प्रदेशमा सरकारलाई दिएको समर्थन फिर्ता लिन लागेको छ । गण्डकीमा पनि माओवादीको सोही तयारी रहेको छ। यसैबीच बागमतीमा भने मुख्यमन्त्री शालिकराम जमकट्टेलले विश्वासको मत लिने तयारी गरेका छन् ।