चलचित्र ‘पशुपति प्रसाद २ : भष्मे डन’को छायाङ्कन सुरु गरिएको छ ।

व्यावसायिक तथा समीक्षात्मक दुवै रुपमा सफल चलचित्र ‘पशुपति प्रसाद’को चरित्र केन्द्रित सिक्वेलको रुपमा निर्माण हुन लागेको चलचित्रको शुक्रवारबाट छायाँकन सुरु गरिएको हो ।

धार्मिक स्थल पशुपतिनाथ परिसरमा चलचित्रका अभिनेता विपिन कार्कीको पहिलो सट खिच्दै निर्माण युनिटले छायाङ्कन सुरु गरेको हो । 

दीपेन्द्र के. खनालको निर्देशन रहने चलचित्रमा विपिनका अलावा सौगात मल्ल, स्वस्तिमा खड्का, वर्षा शिवाकोटी, प्रकाश घिमिरे, रवीन्द्र सिंह बानियाँ, मिस्श्री थापा लगायतको अभिनय रहनेछ ।

टुकी आर्ट्सको प्रस्तुतिमा निर्माण हुने चलचित्रको छायाङ्कन सेडयूल ३० दिनको रहेको बताइन्छ । टुकी आर्टस् प्रा.लि.को ब्यानरमा निर्माण हुने चलचित्र आगामी दशैंको फूलपातीमा प्रदर्शनमा आउने घोषणा भइसकेको छ । 

यसअघि ‘पशुपति प्रसाद’मा शीर्ष भूमिकामा रहेका खगेन्द्र लामिछाने यो चलचित्रमा लेखक एवं निर्माताका रुपमा मात्र छन् ।

चलचित्रमा निरज कँडेलको डिओपी रहनेछ ।