हास्य कलाकार सिताराम कट्टेल ‘धुर्मुस’ र कुञ्जना घिमिरे ‘सुन्तली’ अलपत्र रहेको चितवनको गौतमबुद्ध अन्तराष्ट्रिय क्रिकेट रंगशालालाई लिएर तनावमा छन् । 

‘धुर्मुस’ले एक भिडियो पोस्ट गर्दै आफूले डेढ वर्षदेखि मानसिक यातना भोगिरहेको बताउँदै क्रिकेट रंगशालाको जिम्मा लिन सरकारलाई अनुरोध गरेका थिए । उक्त भिडियो सन्देश जारी गरेको केही दिनमै ‘सुन्तली’ले राज्यसँग आफ्नो धेरै मन दुखेको बताएकी छिन् । उनले आफू मानसिक यातनाले विक्षिप्त बनेको समेत बताएकी छन् ।

‘अबको हरेक वार्ता खुलेआम रङ्गशालाको मैदानमा गरियोस् नाकी बन्द कोठामा । मलाई मेरो ईनबक्समा नग्न तस्वीरहरु पठाउन सुरुवात भएको छ । विभिन्न तुच्छ गालीको वर्षात भइरहेको छ’ उनले फेसबुकमा लेखेकी छिन्, ‘म पनि मान्छे हुँ । धेरै मन दुखेको छ राज्य र राष्ट्रसंग । धुर्मुसजीले केही समय धैर्य गर भन्दै गर्दा यतिका समय सुन्नै नसकिने शब्दहरूका गाली गलौज सहँदै आए । र, आज म मानसिक यातनाले विक्षिप्त भएको छु । अब सुन्ने र सहने शक्ति छैन ममा । कि मलाई सफाइ देउ कि सजाय ! तर जे गर्छौ छिटो गर ।’