नेपाल उद्योग वाणिज्य महासंघको आसन्न निर्वाचनमा वरिष्ठ उपाध्यक्षका प्रत्यासी अन्जन श्रेष्ठले आफू निर्वाचित भएपछि अध्यक्ष र जिल्लाका उद्योगी व्यवसायीबीच सेतुको रूपमा काम गर्ने बताएका छन्।

कोशी प्रदेशको काँकरभिट्टामा बुधबार आयोजित ‘लथालिङ्ग अर्थतन्त्र किन, कसरी, को जिम्मेवार ?‘ विषयक कार्यक्रममा उनले भने, ‘विधानमा वरिष्ठ उपाध्यक्षको कामबारे व्याख्या नगरे पनि आफूले सक्रिय रूपमा उद्योगी व्यवसायीहरूको समस्या समाधानमा काम गर्नेछु।'

उनले उद्योगी व्यवसायीहरूको समस्या समाधान गर्दै अर्थतन्त्रलाई सुधार गर्न र सक्रिय रूपमा सहकार्य गर्ने पनि बताए।

‘हामी आफैंले एसएमसईबाट व्यवसाय शुरु गरेर अहिलेसम्म यहाँ आएको हुँ। त्यसैले व्यवसायका समस्याबारे पनि परिचित छु,‘ उनले भने, ‘अहिले बजारमा समस्या छ र हामी सबै ऋण र ब्याज तिर्न कठिनाई भोगिरहेका छौं। त्यसलाई कसरी समाधान गर्नेमा पनि उत्तिकै चिन्तित छु।'

कार्यक्रममा पूर्वअर्थसचिव शिशिर ढुंगानाले अर्थतन्त्र निगरानी प्रणाली कमजोर हुँदा अहिले समस्या आएको भन्दै निजी क्षेत्रसँग समेत सल्लाह नगर्दा यसले थप असर पारेको बताए। 

‘अहिले राजस्व आम्दानी माइनसमा गयो। जसले सरकारको सार्वजनिक खर्च संकुचित बनायो। यसले बजारमा पैसा जान सकेन र सबैतिर समस्या भयो,‘ उनले भने। बैंक तथा वित्तीय क्षेत्रलाई कोभिडपछि सबै छाडिएको तर अहिले सबै एकैपटक कस्ने नीतिले समस्यामा पारेको उनले स्पष्ट पारे।

‘नीति बनाउँदा पर्याप्त सल्लाह नभएको देखिन्छ। सामूहिक सल्लाहसमेत गरिएन र निजी क्षेत्रसँग समेत सरसल्लाह भएन्,‘ पूर्वसचिवले ढुंगानाले भने, ‘मौद्रिक नीतिमा समीक्षा भएन र प्राइभेट सेक्टरसँग छलफल नै गरिएन्।‘

सरकारले अर्थतन्त्र सुधार गर्न आशा सिर्जना गर्नुपर्ने नत्र निजी क्षेत्र निराश हुने र थप आर्थिक असर पर्ने उनको भनाइ छ। 

कार्यक्रममा कोशी प्रदेशमा आधारित रहेर पत्रकारिता गर्दै आएका विराट अनुपमले प्रदेशमा आर्थिक गतिविधिका लागि उच्चतम सम्भावना भएको भन्दै बीबीआईएनमा कोशी प्रदेशले नेतृत्व लिन सक्ने औंल्याए।उनले नेपालको पूर्वी नाकाबाट बंगलादेश, भुटान भारतलगायत देशहरूसम्म यातायात सहज भएको हुँदा यसले बजार विस्तार गर्न सकिने बताए।​

अनुपमले भुटानी नागरिकहरूलाई पूर्वी नाकाबाट भित्र्याएर लुम्बिनीसम्म पुर्‍याउने तथा बंगलादेशीलाई हिमाल हेर्न बोलाउन सकिनेसहित योजनाहरू ल्याउन निजी क्षेत्रसँगसमेत आग्रह गरे। 

जिल्ला नगरतर्फको उपाध्यक्षका प्रत्याशी अरुणराज सुमार्गीले महासंघमा उद्योगीहरूको समस्यामा बोल्ने नेतृत्व चाहिएको भन्दै अन्जन श्रेष्ठलाई वरिष्ठ उपाध्यक्ष चयन गर्न आह्वान गरे। 

अन्य वक्ताहरूले अर्थतन्त्र पूरै बिग्रिएको नभई लथालिंग भएको र सुधार गर्न सकिने अवस्थामा रहेको बताएका थिए ।

सरोकारवालाहरूले अर्थतन्त्रमा केही समस्या भएको तर यसलाई सबै मिलेर सुधार गरर सही ट्र्याकमा ल्याउन सकिने बताए।