उपप्रधानमन्त्री नारायणकाजी श्रेष्ठले गृहमन्त्रीका रूपमा जिम्मेवारी सम्हालेका छन् । 

मन्त्रिपरिषद् पुनर्गठन गर्दा श्रेष्ठलाई गृहको जिम्मा दिइएको हो । पुस ११ गते भौतिक पूर्वाधार र यातायात मन्त्रालयको जिम्मा पाएका श्रेष्ठले ३ महिनामै गृहको जिम्मा पाएका हुन् । 

शुक्रवार अपराह्न सिंहदरबारस्थित गृह मन्त्रालय पुगेर उनले कार्यभार सम्हालेका हुन् ।

गृह मन्त्रालयमा श्रेष्ठको यो दोस्रो कार्यकाल हो । २०६८ सालमा उनी छोटो समयका लागि गृहमन्त्री बनेका थिए । २०६८ सल साउन १६ गतेदेखि भदौ ३ गतेसम्म उनी गृहमन्त्री बनेका थिए । 

प्रधानमन्त्री पुष्पकमल दाहाल ‘प्रचण्ड’ सरकारमा उनले तेस्रो वरीयता पाएका छन् । दोस्रोमा उपप्रधान एवं रक्षामन्त्री पूर्णबहादुर खड्का छन् ।

शुक्रवार नियुक्त भएका सबै ११ मन्त्रीले सिंहदरबारमा कार्यभार सम्हालेका छन् ।