२६ जेठ २०८३, मंगलबार
चीनको नयाँ विमानवाहक युद्धपोतले पहिलोपटक ताइवानको पूर्वी तटबाट आक्रमणको अभ्यास गरेको द वाशिङटन पोस्टले खबर दिएको छ ।
ताइवान जलसन्धि तथा प्रशान्त महासागरमा आफ्नो शक्ति प्रदर्शन गर्ने बेइजिङको सुदृढतालाई यसले प्रस्तुत गरेको छ ।
ताइवानकी राष्ट्रपति त्साई इङ–वनले अमेरिकी संसद्का सभामुख केभिन मककार्थीसँग भेटेपछि चिनियाँ सेनाले तइवान नजिक तीन दिनसम्म सैन्य अभ्यास गरेको थियो ।
पश्चिमी प्रशान्त क्षेत्रमा आकाश र समुद्रमा प्रभुत्व कायम गर्ने उद्देश्यका साथ ताइवानको पूर्वी भागबाट आक्रमणको अभ्यास चिनियाँ सेनाले गरेको थियो । यसअघि चीनले ताइवान जलसन्धिबाट आक्रमणको अभ्यास गर्ने गरेको थियो ।
‘चिनियाँ जनमुक्ति सेनाले रणनीतिक रूपमा यस क्षेत्रलाई नियन्त्रणमा लिन सकेमा अमेरिकाले ताइवानमा हस्तक्षेप गर्ने वा सहयोग गर्ने काम कठिन हुनेछ,’ ताइवानको तामकाङ विश्वविद्यालयमा अन्तर्राष्ट्रिय सम्बन्धका प्राध्यापक लिन यिङ–युले बताए ।
सैन्य अभ्यासको अन्तिम दिन सोमवार ९१ वटा चिनियाा युद्धविमानहरू ताइवानको हवाईक्षेत्रमा उडेको त्यहाँको रक्षा मन्त्रालयले जनाएको छ । तीमध्ये १५ वटा जे–१५ लडाकू विमान चीनको नयाँ विमानवाहक युद्धपोत शानदोङबाट उडाइएका थिए ।
