राष्ट्रिय स्वतन्त्र पार्टीले प्रधानमन्त्री पुष्पकमल दाहाल प्रचण्ड नेतृत्वको सरकारमा सहभागी हुने/नहुने विषयमा शुक्रवार निर्णय लिने भएको छ । आगामी शुक्रबार पुन: बैठक बसेर सरकारबारे स्पष्ट निर्णय गर्ने महामन्त्री तथा प्रवक्ता मुकुल ढकालले जानकारी दिए । 

उनका अनुसार शुक्रबार बस्ने केन्द्रीय समिति र संसदीय दलको संयुक्त बैठकले सरकारबारे स्पष्ट निर्णय गर्नेछ । 'पार्टी अहिले सरकारमा छैन । तर सरकारलाई समर्थन दिएर सत्तापक्षको बेन्चमा बसिरहेको छ,' उनले भने, 'आज के निर्णय गरेका छौं भने पार्टी कि सरकारमा जान्छ कि प्रतिपक्षमा बस्छ । सरकारमा जाने कि प्रतिपक्षमा बस्ने निर्णय गर्न आगामी शुक्रबार संसदीय दल र केन्द्रीय समितिको संयुक्त बैठक बोलाइएको छ ।'

सोमवारको केन्द्रीय समिति बैठकमा पार्टी सभापति रवि लामिछानेले प्रधानमन्त्री प्रचण्डसँग भएको छलफलबारे ब्रिफिङ गरेका थिए । 

पुस ११ गते प्रचण्डको सरकारमा सहभागी भएको रास्वपा रविको नागरिकता विवादमा सर्वोच्चले सांसद पद खारेज गरिदिएसँगै सरकारबाट बाहिरिएको थियो ।

पार्टीका महामन्त्रीसमेत रहेका ढकालले प्रधानमन्त्रीले पुरानै मन्त्रालय दिन तयार रहेको दाबी गरे ।

सोमवार बिहान प्रचण्डले चितवनमा पत्रकारहरूसँग कुरा गर्दै रास्वपा सरकारमा आउन तयार रहेको बताएका थिए ।