भारतीय कुश्ती महासंघका अध्यक्ष बृजभूषण शरण सिंहविरुद्ध धर्ना दिइरहेका पहलमान र दिल्ली प्रहरीबीच बुधवार अबेर राति झडप भएको छ । 

दुवै पक्षबीच लामो समयसम्म विवाद चलेको थियो । आफूमाथि प्रहरीले अभद्र व्यवहार गरेको पहलमानहरूले आरोप लगाएका छन् । 

आज बिहान पनि धर्ना स्थल जन्तर मन्तरमा तनावको स्थिति छ । 

जन्तर मन्तरमा बुधवार राति सथनीय समयअनुसार १० बजेर ४० मिनेट जाँदा दिल्ली सरकारका मन्त्री सोमनाथ भारती अनुमति विना नै ओछ्यान लिएर पुगेका थिए । प्रहरी जवानहरूले उनलाई रोक्ने प्रयास गर्दा उनका केही समर्थकलाई चोट लाग्यो । 

त्यसपछि पहलमानहरूले हंगामा गर्न थाले । दिल्ली प्रहरीका केही जवानले मदिरा पिएर महिला पहलमानहरूमाथि अभद्र टिप्पणी गरेको आरोप पहलमानहरूले लगाए । 

घटनाको सूचना पाएपछि विशाल संख्यामा प्रहरीहरू जन्तर मन्तर पुगे अनि स्थिति सामान्य बनाउन कोशिश गरे । 

रक्सी पिएको प्रहरी जवानको स्वास्थ्य जाँच गराउनुपर्ने माग पहलमानहरूले राखेका छन् । 

नयाँ दिल्लीका डीसीपी प्रणव तायलले कुनै पनि पहलमानलाई प्रहरीहरूले दुर्व्यवहार नगरेको स्पष्ट पारेका छन् । 

बृजभूषण शरण सिंहलाई पक्राउ गर्नका लागि माग गर्दै पहलमानहरूले गरेको धर्नामा अन्य प्रदर्शनकारीहरूले जन्तर मन्तरमा रात बिताएको र होटलबाट खाना मगाएर खाएको आरोप लगाइएको छ । कतिपय महिला पहलमान होटलमा बसेको भनेर समेत विवाद चलिरहेको छ ।