खाँण पक्राउ : ठिक्क पारेको अमलेट नखाई हिँडे, क्यामेराबाट बचाउन प्रहरीसँग गुहार !

नक्कली शरणार्थी प्रकरणमा तत्कालीन गृहमन्त्री एवं कांग्रेसका प्रभावशाली नेता बालकृष्ण खाँण पक्राउ परेका छन् ।

खाँणलाई बुधवार बिहान उनकै निवास चाबहिल मैजुबहालबाट पक्राउ गरी काठमाडौं प्रहरी परिसर टेकु लगिएको छ ।

'विशेष पक्राउ पुर्जी' लिएर प्रहरी टोली निवासमा छिर्दा खाँण त्यहीँ थिए । प्रहरी स्रोतका अनुसार उनी बनिराखेको अमलेट खाने तयारीमा रहेछन् ।

एक्कासि प्रहरी पुगेपछि उनले अमलेट खान पाएनन् । एकछिनमा सारा माहोल बदलियो ।

'हामी पुग्दा उहाँ अमलेट खाने तयारीमा हुनुहुन्थ्यो,' एक प्रहरी अधिकारीले लोकान्‍तरसँग भने, 'तर, क्षणभरमै फरक माहोल बन्यो । उहाँले अमलेट खान पाउनुभएन ।'

शुरूमा पक्राउ पुर्जीबारे चासो राखेका खाँण एकछिनका लागि भन्दै कोठामा छिरे । कोठाबाट कसैलाई फोन गरेका खाँणलाई नियन्त्रणमा लिन सामान्य बल नै प्रयोग गर्नुपर्‍यो ।

निवासबाट खाँणलाई उनकै गाडीमा राखेर काठमाडौं प्रहरी परिसर टेकु ल्याइएको थियो । 

टेकु आइपुग्दा उनी पत्रकारको क्यामेराबाट बच्न खोजिरहेका थिए । गाडीबाट झरेलगत्तै उनको ध्यान क्यामेरासँग अनुहार लुकाउनेतर्फ केन्द्रित थियो ।

उनले प्रहरीलाई नै आफूलाई छेकिदिन आग्रह गरेका थिए ।

'भाइहरू पत्रकारबाट छेकिदिनुस् न, फोटो खिच्न थाले,' खाँणको आग्रहलाई उदृत गर्दै एक प्रहरी अधिकारीले भने, 'उहाँले हामीसँग मलाई छेकिदिनुस् भनिरहनुभएको थियो । क्यामेराबाट जोगिन खोज्नुभएको थियो ।'

उनले क्यामेराबाट जोगिन प्रयास गरे पनि सञ्चारमाध्यममा भने केही तस्विरहरू सार्वजनिक भइसकेका छन् । 

खाँणसँगै बुधवार उनका स्वकीय सचिव नरेन्द्र केसीलाई पनि प्रहरीले पक्राउ गरेको छ । 

शरणार्थी ठगी प्रकरणमा खाँणपत्नी मञ्जु र कांग्रेस सभापति शेरबहादुर देउवापत्नी आरजु राणासमेत जोडिएको विषय सार्वजनिक भइसकेको छ । 

यसै प्रकरणमा मुछिएका एमाले सचिव तथा सांसद टोपबहादुर रायमाझी भने फरार छन् ।

पढ्नुहोस्, यो पनि :

 

खाँण पक्राउको दृश्य : १० नबज्दै पुर्जी कहाँबाट आयो भन्दै प्रतिवाद, आफ्नै गाडीमा टेकुसम्म