नेपाल टेलिकमले सातै प्रदेशमा द्रुत गतिको मोबाइल इन्टरनेट फाइभजी परीक्षणको तयारी गरेको छ । हाल काठमाडौंको सुन्धारा, बबरमहल, कास्कीको पोखरा र पर्साको वीरगन्जमा परीक्षण गरिरहेको र छिट्टै सातै वटा प्रदेशमा फाइभजी परीक्षण गर्ने टेलिकमले जनाएको छ ।

टेलिकमका प्रवक्ता शोभन अधिकारीले हाल परीक्षण भइरहेको स्थानमा व्यावसायिक प्रयोग गर्ने र थप क्षेत्रमा परीक्षण गर्ने विषयमा आन्तरिक तयारी व्यापक भएको छ । टेलिकमले गरिरहेको आन्तरिक परीक्षण एक महिनामा सकिने र त्यसपछि थप निर्णय गरेर जाने टोलिकमको तयारी छ ।

नेपाल दूरसञ्चार प्राधिकरणले परीक्षण भएको ठाउँमा ग्राहकले प्रयोग गर्न पाउनु शर्त राखेकोले त्यसको पनि तयारी टेलिकमले गरिरहेको जानकारी दिएको छ । टेलिकमले अब परीक्षण सकिएको स्थानमा ग्राहकले प्रयोग गर्न पाउने सुविधा दिने गरी थप क्षेत्रमा परीक्षणको काम अगाडि बढाउने भएको छ ।

टेलिकमले थप क्षेत्रमा परीक्षण गर्न फाइभजीको डिभाइस आयातका लागि नेपाल दूरसञ्चार प्राधिकरणसँग फाइभजी डिभाइसको आयात अनुमतिको इजाजतपत्रसमेत मागेको छ । उक्त इजाजतपछि टेलिकमले थप ठाउँमा परीक्षण र भएको परीक्षणमा व्यावसायिक गर्ने विषयमा आन्तरिक गृहकार्य गरिरहेको छ । 

टेलिकमले विगत साढे २ महिनादेखि जीएसएम मोबाइलमा फाइभजी परीक्षण गरिरहेको छ । टेलिकमले आन्तरिक रूपमा गरिरहेको यस्तो परीक्षणलाई थप क्षेत्रमा विस्तार गर्न पनि थप फाइभजीका सामान आयात गर्न दूरसञ्चार प्राधिकरणसँग इम्पोर्ट लाइसेन्स मागिएको टेलिकमको भनाइ छ । 

टेलिकमले सातै प्रदेशमा परीक्षण गर्न टेलिकमले यसको लागि आवश्यक डिभाइस आयात गर्ने प्रक्रियामा नै रहेको छ । थप डिभाइस ल्याएर नयाँ नयाँ ठाउँमा परीक्षण गर्न सकिने भनाइ टेलिकमको छ ।

टेलिकमका अनुसार हाल फाइभजी जम्मा २०० मिटरको क्षेत्रभित्र मात्रै परीक्षण गर्न सकिने क्षमताको छ । अहिले टेलिकमले २६०० मेगाहर्जमा परीक्षण गरिरहेको यो प्रविधि व्यावसायिक प्रयोगमा आउँदा ठूलो क्षमता तथा कम ब्यान्डविथमा गराउने विषयमा पनि आन्तरिक गृहकार्य गरिरहेको छ ।

अहिले सरकारले टेलिकमलार्ई मात्रै फाइभजीको परीक्षण अनुमति दिएको छ । सरकारी संस्थाले सफल प्रयोग गरेपछि मात्रै अन्य कम्पनीलाई दिने सरकारको योजना छ ।