सुर्खेतको पञ्चपुरी नगरपालिकाबाट भरुवा बन्दुकसहित तीन जना पक्राउ परेका छन् ।

पक्राउ पर्नेमा ४५ वर्षीय जगतबहादुर खत्री, ५७ वर्षीय हस्तबहादुर नेपाली र ६० वर्षीय टेकबहादुर बयक रहेका छन् ।

जिल्ला प्रहरी कार्यालय सुर्खेतअन्तर्गत तातोपानी अस्थायी प्रहरी पोष्टबाट खटिएको प्रहरीले उनीहरुलाई पक्राउ गरेको हो । भरुवा बन्दुक लुकाइछिपाई राखेको सूचना प्राप्त गरेलगत्तै त्यहाँ पुगेको प्रहरीले तीन नाल बन्दुकसहित उनीहरुलाई पक्राउ गरेको हो ।

त्यसैगरी, जिल्ला प्रहरी कार्यालय सुर्खेतबाट सादा पोशाकमा खटिएको प्रहरी टोलीले वीरेन्द्रनगर नगरपालिका–३ सुर्खेत हिलेखालीबाट लागुऔषधसहित तीन जनालाई पक्राउ गरेको छ । 

पक्राउ पर्नेमा वीरेन्द्रनगर नगरपालिका–१ का २९ वर्षीय गणेश थापा, वडा नं २ का २३ वर्षीय तपेन्द्र शाही र वडा नं १० का २१ वर्षीय नीरज रानामगर रहेका छन् । उनीहरूको साथबाट ब्राउन सुगर जस्तो देखिने खैरो धुलो दुई पोका बरामद भएको छ । थप अनुसन्धान भइरहेको प्रहरीले जनाएको छ ।