एक व्यक्तिलाई चक्कु प्रहार गरी घाइते बनाएको आरोपमा ४ जना पक्राउ परेका छन् । पक्राउ पर्नेमा सिन्धुलीको तिनपाटन गाउँपालिका–७ का १९ वर्षीय विशाल भन्ने जीवन श्रेष्ठ, २२ वर्षीय खड्कबहादुर श्रेष्ठ, घ्याङलेख गाउँपालिका–३ का २० वर्षीय रोशन कामी, २७ वर्षीय सुरेन्द्रबहादुर कामी रहेका छन् । उनीहरूका साथबाट अँध्यारोमा चम्कने एक वस्तु पनि बरामद भएको प्रहरीले जनाएको छ ।

जिल्ला प्रहरी कार्यालय सिन्धुलीका प्रहरी उपरीक्षक राजकुमार सिलवालका अनुसार घटनापछि उनीहरू फरार रहेका थिए । घटनामा संलग्न अर्का एक जना अझै फरार रहेका र उनको खोजी कार्य भइरहेको प्रहरीले जनाएको छ ।

पक्राउ परेकालाई ज्यान मार्ने उद्योगमा जिल्ला अदालतबाट सात दिनको म्याद थप गरी अनुसन्धान शुरु गरिएको प्रहरी उपरीक्षक सिलवालले जानकारी दिए ।​

उनीहरुले गत वैशाख ३१ थाक्लेडाँडाको जङ्गलमा ढुङ्ग्रेबेँसीका ३० वर्षीय लोकबहादुर सार्कीलाई छुरा प्रहार गरी घाइते बनाएका थिए । ​

लोकबहादुरसँग चकमके जाने क्रममा ढुङ्गा जस्तो देखिने चम्किलो वस्तुको विषयमा बिबाद हुँदा ती पाँचै जनाले आक्रमण गरी घाइते बनाएको उजुरी परेको प्रहरीले जनाएको छ ।

उनको दाहिने पातामा छुरा प्रहरा गरी साथमा रहेको रु ३० हजार र एक थान मोबाइलसमेत लगेको बताइएको छ ।