नेकपा एमालेका प्रमुख सचेतक पदम गिरीले प्रधानमन्त्री पुष्पकमल दाहाल ‘प्रचण्ड’ले सांसदहरूको प्रश्नको जवाफ गम्भीरताका साथ नदिएको बताएका छन् ।

बिहीवारको प्रतिनिधिसभा बैठकपछि सञ्चारकर्मीसँग कुराकानी गर्दै प्रमुख सचेतक गिरीले प्रधानमन्त्री प्रचण्डबाट गम्भीरता र महत्त्वका साथ प्रश्नको जवाफ नआएको बताए ।

प्रश्नोत्तर केवल औपचारिकतामा मात्रै सीमित भएको उनले बताए । मुलुकमा आर्थिक संकट भए पनि समस्याको समाधान गर्ने ठोस योजना सहितको जवाफ प्रधानमन्त्रीले दिन नसकेको उनको भनाइ छ । सरकार कुहिरोको कागजस्तो दिशाहीन अवस्थामा रहेको उनले बताए ।

प्रमुख सचेतक गिरीले आगामी बजेट रोजगारी सिर्जना गर्ने क्षेत्रमा लगानी गर्ने गरी आउनुपर्ने बताए ।

उनले भने, ‘सरकार कुहिरोको काग जस्तो छ । अहिले पनि दिशाहीन स्थितिमा छ । अहिले पनि धेरै इस्युहरूमा प्रस्ट हुन सकिराखेको छैन र भोलिको बाटो कुन हो भन्ने कुरामा सरकारले गन्तव्य सही ढंगले पहिल्याउन सकेको छैन । रोजगारी सिर्जना गर्ने क्षेत्रमा लगानी गर्नुपर्‍यो । अनुत्पादक क्षेत्रमा पैसा अनावश्यक खर्च गर्नुभएन । आयातलाई प्रतिस्थापन गर्ने खालका क्षेत्रहरूमा लगानी बढाउनुपर्‍यो । क्षेत्र निर्धारण गरेर लगानी गर्ने ढंगले बजेट आउनुपर्छ भन्ने ठान्छु ।’

एमाले सांसद योगेशकुमार भट्टराईले संसदमा प्रधानमन्त्रीसँगको प्रश्नोत्तर जीवन्त नभएको टिप्पणी गरे । प्रश्न पहिले नै सोध्ने र तयारी साथ उत्तर ल्याएर प्रश्नोत्तर गर्दा जीवन्त नहुने उनको भनाइ छ । प्रश्नोत्तर केवल कर्ममाण्डी मात्रै भएको उनले बताए । भट्टराईले नक्कली भुटानी शरणार्थी प्रकरणको घटनालाई सामसुम पारिने हो कि भन्ने आशंका आफूलाई उब्जिएको बताए ।

‘हाम्रो आशंका के छ भने राजनीतिक दबाबले, बाह्य दबाबले र विभिन्न खालको दबाबले निर्मला हत्या प्रकरणलाई जसरी अनुसन्धानलाई अन्यत्र मोडियो, त्यसैगरी यो अनुसन्धान अन्यत्र मोडिन्छ कि अथवा यस्तै सामसुम हुन्छ कि भन्ने कुराको आशंका आम हिसाबले उठेको छ । त्यसकारणले त्यसलाई चित्तबुझ्दो प्रधानमन्त्रीको आजको जवाफले दिएन ।’

उनले धेरै प्रश्नहरूमा प्रधानमन्त्रीले स्पष्ट जवाफ नदिएको बताए ।