सरकारले वर्षामा ५० युनिट र हिउँदमा ३० युनिटसम्म मात्र खपत गर्ने ग्राहकलाई बिजुली नि:शुल्क उपलब्ध गराउने भएको छ ।

शुक्रवार संघीय संसद्को संयुक्त बैठकमा आर्थिक वर्ष २०८०/०८१ का लागि सरकारको वार्षिक नीति तथा कार्यक्रम प्रस्तुत गर्दै राष्ट्रपति रामचन्द्र पौडेलले विपन्नलाई नि:शुल्क मिटर उपलब्ध गराइने समेत उल्लेख गरे ।

'ऊर्जामा सबै नागरिकको पहुँच सुनिश्चित गरिनेछ । आगामी २ वर्षभित्र सबैको घरमा विद्युत् पुर्‍याइनेछ । विपन्नलाई नि:शुल्क विद्युतीय मिटर उपलब्ध गराइने छ । वर्षामा मासिक ५० र हिउँदमा ३० युनिटसम्म विद्युत् खपत गर्ने ग्राहकलाई नि:शुल्क विद्युत् उपलब्ध गराइने छ,' राष्ट्रपति पौडेलले भने ।

साथै सरकारले ग्यासलाई विद्युतबाट प्रतिस्थापन गर्ने लक्ष्य लिएको छ ।

सन् २०४५ भित्र शून्य कार्बन उत्सर्जनको लक्ष्य हासिल गर्न खनिज उर्जालाई स्वच्छ र नवीकरणीय उर्जाले प्रतिस्थापन गर्ने राष्ट्रपति पौडेलले उल्लेख गरे ।