राजवंशी कोटामा ४० जना राजवंशीलाई रोजगारीका लागि जापान लैजाने भन्दै आफन्तमार्फत रकम असुली गरेर सम्पर्कविहीन भएका १ जनालाई प्रहरीले पक्राउ गरेको छ ।

जापान लैजाने भन्दै मोरङको सुनवर्षी नगरपालिका र कटहरीका ४० युवाबाट साढे २ करोड बढी रकम लिएर ठगी गरेको आरोपमा प्रहरीले उनलाई पक्राउ गरेको हो । 

यसरी पक्राउ पर्नेमा सुनवर्षी नगरपालिका–६ का ३५ वर्षीया अजय राजवंशी रहेका छन् । मोरङ प्रहरीले ठगी आरोपमा विराटनगरबाट उनलाई पक्राउ गरेको मोरङ प्रहरीका प्रवक्ता डीएसपी रन्जनकुमार दाहालले जानकारी दिए । 

पक्राउ परेका राजवंशीको ६ जनाको समूहले सुनवर्षी नगरपालिका र कटहरीका ४० बढी युवालाई जापान पढाउने भन्दै २ करोड ५३ लाख ७५ हजार रुपैयाँ असुली गरेका छन् । राजवंशीलाई १ जना युवाले जापान लैजाने सपना देखाएर १८ लाख रुपैयाँसम्म बुझाएको खुलेको छ । 

१ वर्षअघि जापानमा बसेर नाता पर्ने सुरेन्द्र राजवंशी लगायत ४० जनालाई फोन गरेर जापान लैजाने भन्दै २ करोड ५३ लाख ७५ हजार रुपैयाँ ठगी गरेको प्रहरीको प्रारम्भिक अनुसन्धान छ ।

मोरङ प्रहरीका अनुसार गिरोहका रन्जितकुमार राजवंशी, प्रमोदकुमार राजवंशी, विद्याकुमारी राजवंशी र अनुराधा राजवंशी फरार छन् । प्रहरीका अनुसार पीडित ४० जनाले अजयसहित ६ जनाविरुद्ध ठगी आरोपमा प्रहरीमा उजुरी दिएका थिए । तीमध्ये अजयका बुवा विशमलाललाई प्रहरीले पीडितको उजुरीलगत्तै नियन्त्रणमा लिएर सोधपुछ गरी हाजिरी जवानीमा छाडेको थियो । ४ वर्ष जापानमा बसेका अजयले जापानमै रहेको समयमा मोरङ र झापामा बसोबास गर्ने ४० जना राजवंशी परिवारलाई राजवंशी कोटामा रोजगारीका लागि जापान लैजाने भन्दै आफन्तमार्फत रकम असुली गरेर सम्पर्कविहीन भएका थिए । 

यसरी ठगीएका थिए ४० युवा 

सुनवर्षी नगरपालिका–३ भेलाहीका ३६ वर्षीय मदनकुमार राजवंशी शिक्षक हुन् । उनले विराटनगरको एक निजी विद्यालयमा अध्यापन गराउँदै आएका छन् । उनकै साथी सुनवर्षी–३ का ३६ वर्षीय अजय राजवंशीले जापानमा मासिक साढे २ लाख रूपैयाँ कमाइ हुने सुनाएपछि उनले जापान जाने निधो गरे । मेनेजर पदमा जापान जाँदा १६ लाख रुपैयाँ लाग्ने अजयले उनलाई सुनाए । सोही अनुसार ऋण काढेर मदनले २ किस्ता गरी १६ लाख अजयलाई बुझाए । 

अजयले भनेका व्यक्ति फिरोद कार्कीको नाममा गत वैशाख १४ गते ५ लाख र २०६९ भदौ २७ गते रन्जीताकुमारी राजवंशीको नाममा ११ लाख रुपैयाँ मदनले बैंंकमा हालिदिएको भौचर सुरक्षित राखेका छन् ।

१६ लाख रुपैयाँ अजयलाई बुझाएपछि उनलाई भिसा पनि पठाइएको थियो । ढिलोमा गत कात्तिकसम्ममा जापान पठाउने वाचा गरिएको थियो । अजयले दिएको समय ३ पटक सरेको उनी बताउँछन् । पटक–पटक भाका सारेपछि गत मंसिरदेखि अजय सम्पर्कमा नआएको मदन कुमारले बताए । उनले पठाएको भिसा  पनि नक्कली भएको मदनले बताए । 

मोरङको कटहरी–३ हल्दीबारीका ३६ वर्षीय विवेक राजवंशीले मासिक ४ लाख रुपैयाँ कमाइ हुने आश्वासनमा १८ लाख पैसा अजयलाई बुझाए । उनले ४ किस्ता गरी १८ लाख रुपैयाँ अजयले भनेको व्यक्तिको नाममा बैंकमा जम्मा गरेको भौचर राखेका छन् । स्नातक उत्तीर्ण गरेका विवेकलाई पनि जापानमा मेनेजरमा पठाउने भनिएको थियो ।

‘जग्गा धितो राखेर ऋण खोजेर पैसा बुझाएँ,’ उनले भने, ‘विदेश पठाउने अजय सम्र्पकविहीन भएका थिए, अहिले पक्राउ परेका छन् ।’

जापान जान पाउने हल्लाले कतिले घरजग्गा बन्धकी राखेर साहुसँग रकम लिएका छन् । सयकडा ३–५ सम्मको ब्याजले उनीहरूको साँवा र ब्याज बढेको छ ।

झापाको कनकाई–१ क भवानी प्रसाद अधिकारीले ८ लाख रुपैयाँ बुझाएको बताए । ऋण काढेर वैदेशिक रोजगारको नाममा पढाएको पैसा कसरी फिर्ता ल्याउने र कसरी ऋण बुझाउने भन्ने चिन्ताले सताएको उनले सुनाए । 

मोरङका ४० र झापा १ जना गरी ४१ जना युवाहरूलाई वैदेशिक रोजगारको नाममा ठगेका अजय पक्राउ परे पनि उनका भाइ रन्जित, बुहारी अनुराधा र चितवनका राजेन्द्र अधिकारी फरार छन् ।