नेकपा एमालेका अध्यक्ष केपी शर्मा ओलीले पार्टीलाई शुद्धीकरण गर्ने ठूलो मौका मिलेको बताएका छन् ।

मुलुकको समृद्धि र विकासमा केन्द्रित भएर काम गर्न पार्टीका नेता–कार्यकर्तालाई निर्देशन दिँदै ओलीले पार्टीलाई अझ सशक्त ढंगले पुनर्जिवित गर्ने मौका प्राप्त भएका बताए ।

‘हुँडारका बथानले जस्तो आक्रमण गर्दा पनि पार्टीलाई पुनर्जिवित र अझ मजबुतीका साथ, सशक्त ढंगले पुनर्जिवित गरेका छौं’ उनले भने, ‘जीवन शर्माको गीतजस्तै पिलो निचोरिँदैमा वजन घटेको हुँदैन भनेजस्तो पिलो निचोरिएजस्तो मात्रै भएको छ । पीडा घटेको जस्तो मात्रै भएको छ’ मंगलवार ललितपुरमा एमाले जनसंगठन पदाधिकारी भेलालाई सम्बोधन गर्दै ओलीले भने ।

‘पार्टी ध्वस्त पार्ने, पार्टी चल्न नदिने, पार्टीमा गति आउन नदिने, पार्टी नीतिप्रति, पार्टीप्रति, पार्टी नेतृत्वप्रति अनास्था जगाउने, निष्ठा ध्वस्त पार्ने, आस्था भंग गरिदिने त्यही काम मात्रै गरेर पार्टी भित्र बस्ने भन्दा नराम्रा घटनाहरू घटे । तर हामीले पार्टीलाई शुद्धीकरण गर्ने ठूलो मौका पायौं । अहिले पनि सम्पूर्ण रुपमा शुद्धीकरण भयो भन्दिन म । तर मूल भूत रुपमा सुद्धीकरण भयो । त्यस शुद्धीकरणले पार्टीलाई छोटो समयमा यति मजबुतीका साथ फेरि ल्यायो’ उनले भने ।

संसदीय सिटहरूमा अहिलेको भन्दा धेरै सिट ल्याउन सक्ने सकिने अवस्था भएको भए पनि केही प्राविधिक कमजोरीले त्यस्तो नभएको उनको भनाइ थियो ।