ग्राहकको खाताबाट रकम हराएको समाचारप्रति माछापुच्छ्रे बैंकको ध्यानाकर्षण

माछापुच्छ्रे बैंकले ग्राहकको खाताबाट रकम हराएको भन्दै आएका समाचारप्रति ध्यानाकर्षण भएको जनाएको छ ।

बैंकले मंगलवार एक प्रेस  विज्ञप्ति जारी गर्दै रौतहटस्थित चन्द्रपुर शाखाबाट ग्राहकको खाताबाट रकम हराएको भन्दै विभिन्न सञ्चार माध्यमबाट आएका समाचारप्रति बैंकको गम्भीर ध्यानाकर्षण भएको जनाएको हो ।

‘माछापुच्छ्रे बैंकको रौतहटस्थित चन्द्रपुर शाखाबाट ग्राहकको खाताबाट रकम हराएको सम्बन्धमा विभिन्न सञ्चारमाध्यमबाट आएका पछिल्ला समाचारप्रति यस बैंकको गम्भीर ध्यानाकर्षण भएको छ ।

ग्राहकको गुनासो प्राप्त भएपछि बैंकले अनुसन्धान गर्दा सम्पूर्ण रकम ग्राहकको मोबाइल बैंकिङ प्रयोग गरी बैंकका विभिन्न खाताहरू तथा खल्ती वालेटमा ट्रान्सफर गरिएको देखिएको छ’ बैंकले भनेको छ ।

‘बैंकको सिस्टममा कुनै समस्या नदेखिएको र बैंकबाट पठाएको सम्पूर्ण एसएमएस एक्टिभेसन कोड तथा ओटीपी ग्राहककै मोबाइलमा भएको देखिएको हुँदा उक्त कोड अनधिकृत व्यक्तिलाई जानकारी नगराइ वा ग्राहकको मोबाइलमा अनधिकृत पहुँच नपुर्‍याई उक्त कारोवार हुन नसक्ने देखिन्छ’ बैंकद्वाारा जारी विज्ञप्तिमा भनिएको छ ।

साथै यस सम्बन्धमा थप अनुसन्धानका गरी कारवाहीका लागि प्रहरीमा अनुरोध गरिसकेको बैंकले जनाएको छ ।