फरार रहेका भरातीय नागरिक बेचन झाले नक्कली शरणार्थी प्रकरणमा मन्त्रिपरिषद्‌बाट नै निर्णय गराइदिने भन्दै रामशरण केसीबाट २ करोड रूपैयाँ बुझेको खुलेको छ।

जिल्ला सरकारी वकिल कार्यालयमा अनुसन्धान अधिकृत केसीसँग गरेको बयानमा उक्त कुरा खुलेको हो । ‘२०७८ मंसिर १३ गतेको मन्त्रिपरिषद् बैठकबाट हामीलाई काम लाग्ने निर्णयहरू हुनलागेको छ । उक्त निर्णय गराउन बेचन झाले केही रकमहरू मागेका छन् । उनलाई चेक काटिदिनु भनी प्रतिवादी सानु भण्डारीले भनेपछि मेरो हिमालयन बैंकमा रहेको खाताबाट बेचन झालाई २ करोडको चेक काटी मेरो दस्तखतसमेत गरी दिएको हो,’ केसीले बयानमा उल्लेख गरेका छन् ।

उक्त चेक काठमाडौंको बानेश्वरस्थित व्हाइट हाउस अगाडि बाटोमा २०७८ मंसिर ८ गते राति भेटेर नै दिएको उनले बयान दिएका छन् ।

‘उक्त चेकको फोटोसमेत खिची मेरो साथी प्रेमराज पन्थीलाई पठाएको तथा म पक्राउ पर्नु भन्दा अगाडि मेरो साथी पविता राईलाई सो घटनासम्बन्धमा भएको प्रमाण कागजहरू सुरक्षित राख्न दिएको’ उनले बयानमा भनेका छन् ।

‘बेचन झालाई चेक दिँदा मेरो मोबाइलमा उक्त चेक दिइएको भिडियो समेत खिचेकोले आवश्यक परेमा पछि भिडियो पेस गर्न सक्छु’ उनले बयानमा थप भनेका छन् ।