नेपाल टेलिकमले नक्कली विज्ञापनप्रति गम्भीर ध्यानाकर्षण भएको जनाएको छ ।

टेलिकमले बुधवार एक प्रेस विज्ञप्ति जारी गर्दै विभिन्न शाखाहरूमा काम गर्न भ्याकेन्सी खोलिएको भनेर आएका विज्ञापनमा कुनै सत्यता नभएको र कम्पनीको आधिकारिक सूचनालाई मात्र आधार मान्नक लागि आग्रह गरेको छ ।

‘‘केही दिन यता ‘नेपाल टेलिकमका विभिन्न शाखाहरूमा काम गर्न भ्याकेन्सी खोलिएको’ भनेर कम्पनीका पदाधिकारीहरूको नामसमेत जोडेर विभिन्न फेसबुक ग्रुप र म्यासेन्जर तथा ह्वाट्सएपलगायतका सामाजिक सञ्जालमार्फत गलत सूचना प्रवाह भएको सम्बन्धमा कम्पनीको गम्भीर ध्यानाकर्षण भएको छ ।’’ टेलिकममा जारी प्रेस विज्ञप्ति भनिएको छ ।

‘कर्मचारी आवश्यकतासम्बन्धी सूचना कम्पनीले राष्ट्रिय दैनिक गोरखापत्र तथा कम्पनीको वेबसाइटमा मात्र आधिकारिक रुपमा सार्वजनिक गर्ने गरेकोले यस प्रकारका गलत सूचनाको भ्रममा नपरी आधिकारिक माध्यमबाट सम्प्रेषित सूचनालाई मात्र ग्रहण गरिदिनु हुन हार्दिक अनुरोध गरिन्छ ।’ टेलिकमका प्रवक्ता शोभन अधिकारीद्वारा जारी विज्ञप्तिमा उल्लेख गरिएको छ ।