गाडी चोरीको आरोप लागेपछि कराँतेका मुख्य प्रशिक्षक श्रेष्ठ बर्खास्त

कराँतेको मुख्य प्रशिक्षक काजीमान श्रेष्ठलाई गाडी चोरीको आरोप लागेको छ ।

फुल कन्ट्याक्ट बुँदोकैदो कराँतेका मुख्य प्रशिक्षक श्रेष्ठविरुद्ध गाडी चोरीको आरोप लागेपछि राष्ट्रिय खेलकुद परिषद्ले उनलाई मुख्य प्रशिक्षकबाट बर्खास्त गरेको छ ।

श्रेष्ठ माघ १९ गते मात्रै राष्ट्रिय खेलकुद परिषद् अन्तर्गत काठमाडौं जिल्ला खेलकुद विकास समितिका मुख्य प्रशिक्षकमा बढुवा भएका थिए ।

प्रशिक्षक श्रेष्ठले आफ्नो गाडी चोरी गरेको बताउँदै जीवन पाण्डेले प्रमाणसहित परिषद्‌मा मंगलवार उजुरी दिएका थिए । उनको उजुरीपछि परिषद्ले श्रेष्ठलाई मुख्य प्रशिक्षकबाट हटाएको निर्देशक प्रचण्ड शर्माले बताए । 

शर्माले गाडी चोरीको आरोप लागेकै कारण श्रेष्ठलाई मुख्य प्रशिक्षकबाट हटाइएको बताए । शर्मासँग श्रेष्ठले बुधवार नै गाडी फिर्ता गर्छु भनेका थिए । अझै किन फिर्ता गरेनन् भन्ने विषयमा जानकारी नपाएको शर्माले बताए ।

गाडी धनी पाण्डेले आफ्नो नाममा दर्ता रहेको बागमती प्रदेश ०१–०२६–७७२१ नम्बरको निशान कम्पनीको डास्टुन रेडी गो गाडी पटक–पटक माग्दा पनि नदिएपछि प्रहरीमा उजुरी गर्नुपरेको बताएका छन् ।

पाण्डले संचारकर्मीहरूसँग उक्त गाडीको कागजातसमेत देखाएका थिए । पाण्डेसँग भएको कागजातअनुसार पाण्डेले मेगा मोर्टस भन्ने कम्पनीबाट उक्त गाडी किनेको देखिन्छ ।

गाडीको विलबुकमा गाडी धनीमा पाण्डेको फोटो टाँसिएको छ ।

‘मैले कम्पनीबाट गाडी किनेपछि एकपटक उनलाई भेटेर गाडी फिर्ता मागेको थिएँ । उनले २/४ दिनको समय मागेका थिए । त्यसपछि पटक–पटक गाडी फिर्ता दिने बताए पनि विभिन्न बहाना बनाएर गाडी फिर्ता दिएनन्’ उनले भने ।

पाण्डेले श्रेष्ठसँग भएको टेलिफोन रेकर्डसमेत सुनाएका थिए । टेलिफोन कुराकानीमा प्रशिक्षक श्रेष्ठले पाण्डेलाई वैशाख २५ गते सोमवार गाडी फिर्ता दिने बताएका थिए । तर सोमवार उनले गाडी फिर्ता नगरेको पाण्डेले बताए । 

त्यसपछि फेरि प्रशिक्षक श्रेष्ठले पाण्डेसँग गाडी पोखरामा आफ्नो भतिजले चलाइरहेकोले आफै गएर गाडी ल्याइदिन्छु भन्दै  विहीवार अर्थात वैशाख २८ गते दिउँसो १२ बजेसम्मको समय मागेको फोन सम्वादमा सुन्न सकिन्छ ।
त्यसपछि फेरि प्रशिक्षक श्रेष्ठले शुक्रवार दिउँसोको समय मागेका थिए । तर शुक्रवार पनि गाडी फिर्ता नगरी शनिवार वैशाख ३० गते गाडी फिर्ता दिन्छु भनेका छन् ।

पटक–पटक भाका सार्दै आएका श्रेष्ठलेको नियत गाडी फिर्ता नदिने देखिएको छ । उनले आज विहीवार २ बजेको भाका राखेको पाण्डेले बताए ।

‘खेलाडी जस्तो मान्छे किन बदनाम गर्नु भनेर म चुप लागेर बसेकाे हुँ । पटक–पटक गाडी फिर्ता दिन्छु मेरो बदनाम नगरिदिनुस् भन्छन् । तर गाडी फिर्ता गर्दैनन् । त्यसैले मैले उजुरी दिने निर्णय गरेको हुँ,’ उनले भने ।

विगत लामो समयदेखि खेलकुद क्षेत्रमा सक्रिय रहेका श्रेष्ठ २०७९ माघ १९ गते मात्रै राष्ट्रिय खेलकुद परिषद्को सदस्य सचिवस्तरीय निर्णयबाट मुख्य प्रशिक्षकमा बढुवा भएका थिए ।

त्यस अघि उनी सहायक प्रशिक्षकका रुपमा कार्यरत रहेका थिए । लोकान्तरले काजीमान श्रेष्ठसँग सम्पर्क गर्न खोज्दा उनी सम्पर्कमा आउन चाहेनन् ।