रुस तथा अन्तर्राष्ट्रिय सहयोगीहरूले मिलेर न्यायपूर्ण बहुध्रुवीय विश्व बनाउने रुसका राष्ट्रपति भ्लादिमिर पुटिनले बताएका छन् । 

बुधवार सुरक्षा मामिलामा उच्च प्रतिनिधिहरूको ११औं अन्तर्राष्ट्रिय बैठकलाई भिडियोमार्फत सम्बोधन गर्दै पुटिनले संयुक्त जोखिम तथा चुनौतीलाई सामना गर्नका लागि मस्को सबै मुलुकसँग सहकार्य गर्न तयार रहेको बताए ।

‘हामी न्यायपूर्ण बहुध्रुवीय विश्व मिलेर बनाउन सक्छौं भनी म विश्वस्त छु,’ पुटिनले बताए, ‘बहिष्कारवादी विचारधाराका साथै नवउपनिवेशवादी प्रणालीले सारा संसारको स्रोतसाधन दोहन गर्न पाएको थियो तर त्यो अब अतीत बन्ने पक्का छ ।’

रुसका सहयोगीहरू विभिन्न क्षेत्र र महादेशमा विद्यमान रहेको तथा रुसी अधिकारीहरूले यी सम्बन्धलाई उच्च मूल्यांकन गरिरहेको उनको भनाइ छ । 

अमेरिका तथा उसका साझेदारहरूले अन्य मुलुकको आन्तरिक मामिलामा हस्तक्षेप गरी अन्तर्राष्ट्रिय रूपमा अस्थिरता निम्त्याइरहेको आरोप पनि पुटिनले लगाए । 

विभिन्न मुलुकहरूले संसारमा स्थिरतालाई बलियो बनाउन र एकीकृत अविभाज्य सुरक्षा प्रणालीको निर्माण गर्न सहकार्य गर्नुपर्ने उनको भनाइ छ ।