नेपाल र चीनबीचको व्यापारिक नाका तातोपानी गत वैशाख अन्तिमबाट सञ्चालनमा आएको छ । तर सडकको अवस्थाले दुर्घटनाको जोखिम बढाएको छ ।​

नेपालतर्फको बाह्रबिसेदेखि नाकासम्मकै सडकको अवस्था दयनीय हुँदा दुर्घटनाको जोखिमका कारण नेपाली व्यवसायीहरूले आवश्यक सामग्री ओसारपसार गर्न सकेका छैनन् ।

पछिल्लो समय सडकको दुरावस्थाका कारण तातोपानी नाकाबाट व्यवसायीहरूका सामान आयात गर्नै छाडेका छन् ।

चीनबाट तातोपानी नाका हुँदै सामान आयात गर्ने व्यवसायीहरू नाकाको मुख्य सडक मर्मत नहुँदा समान ढुवानी गर्न समेत समस्या भएको गुनासो गर्छन् ।

व्यवसायी दामोदर सत्यालले ४० फिटको कन्टेनर सामान बोकेर काठमाडौंसम्म ल्याउनको लागि सडक जीर्ण भएकाले असहज भइरहेको बताए ।

सडक राम्रो नहुँदा र तातोपानी नाकाबाट सामान नेपाल भित्र्याउँदा धेरै समय लाग्ने गरेकाले व्यवसायीहरूले अर्को नाकाबाट सामान आयात गर्ने गरेको गुनासो गरे ।

सडकको स्तरोन्नति र विस्तार हुन नसक्दा व्यवसायीहरूले बर्सेनि सास्ती भोग्नुपरेको छ । तातोपानी क्षेत्र भौगोलिकरुपमा पनि विपद्को उच्च जोखिममा रहेकाले वर्षायाम शुरु भएसँगै सडकमार्ग जीर्ण छ ।

सरकारले चीनसँगको प्रमुख व्यापारिक तातोपानी नाका जोड्ने सडक पूर्वाधार मजबुत बनाउन नसकेको व्यवसायी दामोदर सत्यालको भनाइ छ ।

उनले सडक पूर्वाधार मजबुत भए मात्रै नाका सञ्चालनमा सहज हुने बताए । सडक जीर्ण भएकै कारण चीनबाट आयात गरिएको सामानको मूल्य काठमाडौं पुर्‍याउँदा बढ्ने गरेको उनले बताए ।

उनले भन्सारमा व्यवसायीका लागि आवश्यक सबै सुविधा सरकारबाट प्राप्त भए पनि सडक मार्ग भने राम्रो बनाउन नसक्दा सधैं समस्या भएको गुनासो गरे  ।

बाह्रबिसेदेखि तातोपानी नाकासम्म २४ किलोमिटर सडक जोखिमपूर्ण रहेको अर्का व्यवसायी विजय शेर्पाले बताए । उनका अनुसार सामान बोक्ने ठूला कन्टेनर सडकमा गुड्न लागेकाले समस्या भइरहेको छ ।

स्थानीय पालिका र व्यवसायीहरूले सरोकारवाला निकायहरूलाई सडक मार्ग स्तरउन्नतिका लागि पहल गर्न आग्रह गर्दा पनि अहिलेसम्म कुनै पहल नभएको उनको गुनासो छ ।

सरकारले तातोपानी नाका जोड्ने सडक समयमानै स्तरउन्नति गरे स्थानीयदेखि व्यवसायीहरूलाई समेत सहज हुने उनले बताए ।

त्यस्तै, तातोपानी सडकका कन्टेनर चालक पेम्बाछिरिङ तामाङले तातोपानी सडकमा ढुवानीको कन्टेनर चलाउन असहज रहेको बताए । उनले सडक सानो र साँघुरो भएकाले दुईतर्फबाट कन्टेनर आउँदा साइट दिने ठाउँसमेत नहुने अवस्था रहेको बताए । कन्टेनर बेला—बेलामा सडकमाथिको पहाडमा ठोक्किने समस्या रहेको उनको गुनासो छ ।

तातोपानी नाका जोड्ने बाह्रबिसेदेखि नाकासम्मको सडक खण्ड व्यवस्थित बनाउन सरकारले दीर्घकालीन योजना बनाएर समस्याको समाधान गर्नुपर्ने उनीहरूको सुझाव छ ।