इण्डियन प्रिमियर लिग (आईपीएल) २०२३ को फाइनल खेल आइतवार राति हुँदैछ । फाइनलमा चेन्नई सुपरकिंग्स र गुजरात टाइटान्स भिड्दै छन् । खेल नेपाली समयानुसार राति पौने ८ बजे हुनेछ । 

चेन्नई गुजरातलाई नै पराजितगरी फाइनलमा पुगेको थियो । क्वालिफायर २ मा मुम्बई इण्डियन्सलाई ६२ रनले पराजित गर्दै गुराजतले चेन्नईसँगको फाइनल भेट पक्का गरेको हो । 

२०२२ को संस्करण पनि गुजरात टाइटान्सले जितेको थियो । आईपीएलको उपाधि मुम्बईले सर्वाधिक ५ र चेन्नईले ४ पटक जितेका छन् । 

आईपीएल पैसै पैसाको खेल मानिन्छ । करोडौं रुपैयाँ हालेर किनिएका खेलाडी सहभागी हुने भएकोले पनि यसको प्रत्येक वर्षको संस्करण रोचक हुने गरेको छ । 

विजेतासहित शीर्ष ४ मा पर्ने टिमले करोडौं रुपैयाँ नगद पुरस्कार पाउँनेछन् । यसपटक ४६.५ करोड भारु नगद पुरस्कार आईपीएलले वितरण गर्दैछ । 

२००८ मा पहिलो संस्करणको आईपीएल विजेताले ४.८ करोड भारु नगद पुरस्कार पाएको थियो । 

यसपटकको विजेताले २० करोड भारु (नेपाली ३२ करोड) नगद पुरस्कार पाउँनेछ । यस्तै उपविजेताले १३ करोड भारु पाउनेछन् । 

तेस्रो हुनेले ७ करोड र चौथो स्थान प्राप्त गर्नेले ६.५ करोड भारु पाउने छ । 

यसपटक मुम्बई इण्डियिन्स तेस्रो र लखनउ सुपरजाइन्ट चौथो भएका छन् ।

प्रतियोगितामा सर्वाधिक रन बटुलेर अरेन्ज क्याप जित्ने ब्याटर र सर्वाधिक धेरै विकेट लिने बलरले पनि १५/१५ लाख भारु प्राप्त गर्नेछन् । 

इमर्जिङ प्लेयर अफ द टुर्नामेन्टले २० लाख, मस्ट भ्यालुएवल प्लेयरले १२ लाख पाउँछन् । 

त्यस्तै, पावर प्लेयर, सुपर स्ट्राइकर र गेम चेन्जरले पनि १५ र १२ लाख नगद पुरस्कार प्राप्त गर्छन् ।