सरकारको स्वामित्वमा रहेका ४४ वटा सार्वजनिक संस्थानमध्ये गत आर्थिक वर्ष २०७८/७९ मा जम्मा २५ वटा मात्रै नाफामा चलेका छन् । अर्थमन्त्री डा. प्रकाशशरण महतले आइतवार प्रतिनिधि सभा बैठकमा आर्थिक सर्वेक्षणसँगै प्रस्तुत गरेको सार्वजनिक संस्थानको अवस्थामा १९ वटा संस्थान घाटामा गएको तथ्य प्रस्तुत भएको हो । 

गत आर्थिक वर्षसम्ममा सरकारको सार्वजनिक संस्थानमा शेयर तथा ऋण लगानी ६ खर्ब १८ अर्ब रुपैयाँ पुगेको छ । यो अवधिमा लगानीको १ प्रतिशत मात्रै लाभांश पाएको छ । यस्तो लाभांश जम्मा ६ अर्ब १६ करोड रुपैयाँ रहेको सार्वजनिक संस्थानको अवस्थाको विवरणमा उल्लेख छ ।

सरकारी स्वामित्वका संस्थाहरूको कूल सञ्चालन आय भने ३६.२ प्रतिशतले बढेको छ । यस्तो आय गत आवमा ५ खर्ब ७५ अर्ब रुपैयाँ पुगेको छ । प्रभावकारी रूपमा सञ्चालन हुन नसकेका र सार्वजनिक क्षेत्रमा राख्न आवश्यक नभएका संस्थाको पहिचानगरी थप पुँजी प्रविधि र सक्षम व्यवस्थापनसहित निजी क्षेत्रबाट सञ्चालन हुने देखिएको अर्थमन्त्री महतले बताए ।

निजीकरण गरिने र सार्वजनिक संस्थान उद्देश्य अनुसार नभएको वस्तु तथा सेवाको गुणस्तरको नियमित अनुगमन गर्नुपर्ने अवस्थामा रहेको पनि अर्थमन्त्री महतको भनाइ छ ।

अघिल्लो आर्थिक वर्ष २०७८/७९ को तुलनामा थप ३ संस्थान नाफामा गएका छन । अधिकांश सार्वजनिक संस्थानहरूको उपलब्धि नदेखिएको बताउँदै त्यस्ता संस्थानहरूलाई निजीकरण वा सार्वजनिक गर्न आवश्यक रहेको पनि अर्थमन्त्री महतले बताए । 

अर्थमन्त्री महतले सामाजिक संस्थाहरूलाई निजी क्षेत्रमा रूपान्तरण गरेर चलाइने, निजीकरण गरिने र सार्वजनिक गरिने संस्थाहरूको कार्य प्रणालीको अध्ययन अवलोकन गरेर थप सुधार गनुपर्ने अवस्था रहेको समेत बताए ।