चालू आर्थिक वर्षको पछिल्लो ८ महिनामा देशैभर जम्मा १०४ किलोमिटर मात्रै निर्माण भएको छ । सरकारले सार्वजनिक गरेको चालू आर्थिक वर्ष २०७९/८० को आर्थिक सर्वेक्षणअनुसार ८ महिना (साउन–फागुन)सम्म एक सय किलोमिटर मात्रै नयाँ सडक बनेको तथ्य सार्वजनिक भएको हो ।

यो अवधिसम्ममा जम्मा १७ हजार ४ सय ८० किलोमिटर सडक कालोपत्रे भएको छ । हालसम्म ७ हजार ९५६ किलोमिटर ग्राभेल र ८ हजार ६६४ किलोमिटर कच्ची सडकगरी हालसम्म संघीय सरकारबाट निर्माण भएको सडकको लम्बाइ ३४ हजार १ सय किलोमिटर पुगेको छ।

कूल सडकमध्ये कालोपत्रे ५१.३ प्रतिशत, ग्राभेल २३.३ प्रतिशत र कच्ची सडक २५.४ प्रतिशत रहेको छ। २०७९ असारसम्म सडकको कूल लम्बाइ ३३ हजार ९ सय ९६ किलोमिटर रहेको थियो ।

चालू आवकै पहिले ८ महिना अवधिमा ३१६ किलोमिटर सडक खण्डास्मित (ग्राभेल) स्तरमा र २४८ किलोमिटर सडक कालोपत्रे स्तरमा स्तरोन्नति भएको छ । 

यो अवधिमा ८ हजार २५४ किलोमिटर सडकको नियमित तथा पटक मर्मत भएको छ । यस अवधिसम्ममा २७८ किलोमिटर सडकको आवधिक मर्मत सम्पन्न भएको र ७५ वटा पुलको निर्माण सम्पन्न भएको सरकारले सार्वजनिक गरेको चालू आवको आर्थिक सर्वेक्षणमा उल्लेख छ ।