कोभिड र रसिया-युक्रेन युद्धले विश्व अर्थतन्त्र खलबलिँदा महँगी बढ्यो

सरकारले विश्व अर्थतन्त्रमा आएको मन्दीको असर नेपाली अर्थतन्त्रमा समेत परेको बताएको छ । आर्थिक सर्वेक्षण २०७९/८० सार्वजनिक गर्दै अर्थमन्त्री डा. प्रकाशशरण महतले विश्व अर्थतन्त्रमा आएको मन्दीको असर नेपाली अर्थतन्त्रमा समेत परेको बताए । 

कोभिड–१९ र रसिया–युक्रेन युद्धले अर्थतन्त्र खलबलिँदा नेपालमा महँगी बढेको सरकारको ठहर छ । पछिल्लो ३ वर्षदेखि विश्वव्यापी आर्थिक गतिविधि प्रभावित भएको, आपूर्ति श्रृंखला खल्बलिएको र पेट्रोलियम पदार्थ तथा खाद्य वस्तुको मूल्य बढ्दा अर्थतन्त्रमा चाप परेको उनले बताए । 

जसको कारण मूल्यवृद्धि अहिलेसम्मकै उच्च विन्दुमा पुगेको हो ।

आर्थिक वर्ष २०७९/८० को फागुनसम्म औसत उपभोक्ता मुद्रास्फीति ७.९३ प्रतिशत रहेको छ । गत आर्थिक वर्षको सोही अवधिमा यस्तो मुद्रास्फीति ५.५३ प्रतिशत रहेको थियो । 

वार्षिक विन्दुगत आधारमा २०७९ फागुन महिनामा उपभोक्ता मुद्रास्फीति ७.४४ प्रतिशत रहेको छ । गत आर्थिक वर्षको सोही महिनामा यस्तो मुद्रास्फीति ७.१४ प्रतिशत रहेको थियो ।

आन्तरिक र बाह्य कारण समग्र मूल्यमा अधिक चाप परेको आर्थिक सर्वेक्षण २०७९/८०को को आर्थिक सर्वेक्षणले देखाएको छ । 

बढ्दो मुद्रास्फीतिलाई नियन्त्रण गर्न विश्वका अधिकांश केन्द्रीय बैङ्कले कसिलो मौद्रिक नीति अवलम्बन गरिरहेको परिवेशमा मौद्रिक नीति २०७९/८० जारी गरेको भए पनि मूल्यवृद्धि भने नियन्त्रणमा आउन नसकेको आर्थिक सर्वेक्षणले देखाएको छ ।