सरकारी स्वामित्वमा रहेका विभिन्न ४४ वटा सार्वजनिक संस्थानमध्ये नेपाल विद्यत् प्राधिकरणले सबैभन्दा बढी नाफा कमाएको छ । प्राधिकरणको गत आर्थिक वर्ष २०७८/७९ सम्मको सञ्चित नाफा २४ अर्ब रुपैयाँ छ । संस्थाले गत आवमा ३१ प्रतिशत नाफा कमाएको थियो ।

प्राधिकरणले गत आर्थिक वर्ष २०७८/७९ को एक वर्षमै १३ अर्ब ३७ करोड रुपैयाँ नाफा कमाएको छ । यो संस्थाले पछिल्लो ५ वर्षमा लगातार नाफा कमाउँदै गएको छ । 

प्राधिकरणपछि दोस्रो धेरै नाफा कमाउने संस्थामा नेपाल दूरसञ्चार कम्पनी (नेपाल टेलिकम) रहेको छ । टेलिकमको सञ्चित नाफा ४५ अर्ब रुपैयाँ रहेको छ । 

टेलिकले गत आर्थिक वर्षमा ८ अर्ब ४७ करोड रुपैयाँ नाफा कमाएको छ । टेलिकम पनि सरकारको वर्षेनि नाफा कमाउने संस्थामा पर्छ । यसको पछिल्लो ५ वर्षको तथ्यांक अनुसार नाफा भने घट्दै गएको देखिएको छ । ५ वर्ष अगाडि एकै वर्ष १७ अर्ब नाफा गरेको टेलिकमले गत वर्ष अघिल्लो वर्ष ७ अर्ब मात्रै नाफा कमाएको थियो । 

सरकारको स्वामित्वमा संचालनमा रहेका संस्थानमध्ये सबैभन्दा बढी घाटा हुनेमा नेपाल आयल निगम रहेको छ । यसले गत आर्थिक वर्ष २०७८/७९ सम्मको सञ्चित नोक्सानी १७ अर्ब ८१ करोड रुपैयाँ रहेको छ । नेपाल वायुसेवा निगमको समेत सञ्चित नोक्सानी १५ अर्ब ४७ करोड रुपैयाँ पुगेको छ । 

नेपाल वायुसेवा निगम पछिल्लो चार वर्षदेखि निरन्तर घाटामा सञ्चालनमा छ । यो संस्थाको गत आवको घाटा १ अर्ब ७० करोड रुपैयाँ छ । यसको अघिल्लो वर्ष ३ अर्ब ६६ करोड घाटा थियो । 

निगमले पछिल्लो दुई वर्षमा घाटा कम गर्दै गएको भए पनि जहाज किन्न लिएको ऋण र अपेक्षाअनुसार बढ्न नसकेको आम्दानीका निगम घाटामा चलिरहेको छ ।