सचिव टेकनारायण पाण्डेले बैंक खातामा भएको रकम आफ्नो र श्रीमतीको आम्दानीबाट आएको बयान दिएका छन् ।

नक्कली शरणार्थी प्रकरणमा पक्राउ परेका पाण्डेले ऋण चुक्ता गर्नका लागि रकम बैंकमा जम्मा गरिएको बताएका हुन् । ‘जग्गा बिक्री, शेयर कारोवारको आम्दानी, बीमा परिपक्क भएर प्राप्त रकम र म तथा मेरो श्रीमतीको जागिरबाट प्राप्त वार्षिक आयबाट करिब एक करोड दुई लाख वार्षिक आयस्रोत रहेको छ। सोही आयस्रोतबाट उक्त भुक्तानी भएको छ। आयस्रोतको विवरण सम्मानीत अदालत समक्ष थुनछेक बहसका क्रममा पेश गर्नेछु।’ बयानका क्रममा उनले भनेका छन् ।

त्यसै गरी प्रतिवादी बालकृष्ण खाँणका स्वकीय सचिवलाई पठाएको सन्देश बारे पनि उनले बयान गरेका छन् ।

आफूलाई पक्राउपूर्जी जारी हुँदैछ भन्ने जानकारी अनौपचारिक रुपमा पाएपछि हतासमा वैयक्तिक भावना र सन्देश व्यक्तिगत प्रयोजनका लागि नोटबुकमा लेखेको उनले बयान गरेका छन् । ‘उक्त राति म बस्न घर बाहिर गएँ, बाहिर जाने क्रममा ट्याक्सीमा उक्त नोटबुक छुट्न गएछ। सो नोटबुक नरेन्द्र केसीसमक्ष कसरी पुग्यो मलाई थाहा भएन।’ उनले बयानमा भनेका छन्, ‘सायद नोटबुकमा नरेन्द्र केसीको फोन नम्बर भएर ट्याक्सी ड्राइभरले छोडेको हो की थाहा भएन। उक्त सन्देश पक्राउ पर्ने सूचना भएपछि मानसिक दबाबमा लेखेको हो, पठाउने प्रयोजनले लेखेको होइन । उक्त लेखाईबाट अनुसन्धान र न्यायिक प्रक्रियालाई प्रभाव पार्ने मेरो कुनै मनसाय होइन।’