नेपाली कांग्रेस महामन्त्री गगन थापाले ललितपुर महानगरपालिकाका मेयर चिरिबाबु महर्जनले उदाहरणीय काम गरेको भन्दै प्रशंसा गरेका छन् । मेयर महर्जनलाई भेटेर थापाले नेपालभरका स्थानीय तहका सरकारमध्ये ललितपुर उदाहरणीय रहेको बताएका हुन् । 

‘ललितपुर महानगरपालिका, नेपाल भरका स्थानीय सरकारहरूका लागि उदाहरणीय नगरपालिका रूपमा स्थापित नगरपालिका हो,’ थापाले सामाजिक सञ्जालमा लेखेका छन्, ‘चिरिबाबु दाईको दृढता साँच्चै सराहनीय छ। स्थानीय सरकारलाई थप प्रभावकारी रूपमा कसरी अघि बढाउने भन्ने सन्दर्भमा उहाँसँग भएको छलफल।’
 
थापाले भेटका क्रममा पार्टीले गर्न सक्ने समन्वयको लागि तयार रहेको बताएका थिए । ‘पार्टीका तर्फबाट स्थानीय तहमा निर्वाचित हुनुभएका जनप्रतिनिधिले कसरी काम गर्नुभएको छ । यसमा महामन्त्रीले बुझ्ने र आवश्यक समन्वय गर्ने जिम्मेवारी पाउनुभएको छ,’ थापाका स्वकीय सचिव प्रताप पौडेलले भने, ‘यसै क्रममा राम्रो काम गर्नेमध्ये ललितपुर महानगरपालिकाको काम गराई प्रभावकारी रहेको महामन्त्रीले भेटका क्रममा बताउनुभएको छ ।’

मुख्यगरी ललिपुरतका सांस्कृतिक एवं पुरातात्विक सम्पदाको संरक्षण, ट्राफिक लाइट, फोहोरमैला व्यवस्थापन, हरियालीलई प्रवर्द्धन, घरबाटै नागरिकलाई विभिन्न सेवा, इलेक्ट्रिक भेहिकल जस्ता विषयमा महानगरले प्रभावकारी काम गरेको भन्दै थापाले प्रशंसा गरेका हुन् । 

नगरका भित्री पार्टी र व्यवस्थित गल्ली, सडकपेटी निर्माण, पोखरीको संरक्षण जस्ता कामप्रति थापाले खुशी व्यक्त गरेका थिए । 

महर्जन लगातार दुई कार्यकालका लागि अघिल्लो वर्ष ललितपुरको मेयरमा निर्वाचित भएका थिए ।