नेकपा (एमाले)का अध्यक्ष केपी शर्मा ओलीले आफ्नो पार्टी सरकारबाट हटेपछि ‘समृद्ध नेपाल: सुखी नेपाली भन्ने आँट कसैले पनि गर्न नसकेको बताएका छन् ।

पार्टीको विज्ञान तथा प्रविधि विभागले शनिवार च्यासलस्थित पार्टी केन्द्रीय कार्यालयमा आयोजना गरेको कार्यक्रममा बोल्दै उनले आफ्नो पार्टी सरकारबाट हटेपछि ‘समृद्ध नेपालः सुःखी नेपाली’ भन्ने आँट कुनै पनि सरकार र प्रधानमन्त्रीले गर्न नसकेको बताए । 

कुनै व्यक्ति नभई सिंगो समाजलाई माथि उठाउन आफूहरूले समृद्धिको एजेण्डालाई अघि बढाएको उनले  तर्क गरे । 

‘हामी सरकारबाट हटेपछि समृद्ध नेपालः सुखी नेपाली शब्द भन्ने आँट कुनै सरकार, प्रधानमन्त्री र नेताले गर्दैन । ह्वाट दे वान्ट ? समृद्ध नेपाल भन्ने जसको आँट छैन । भन्न सक्दैन ?,' उनले भने, 'हामीले गर्न खोजेको मानव विकास हो । समाजको विकास हो । सिंगै समाजलाई माथि उठाउने हो ।’

अध्यक्ष ओलीले गरिबी छिटो अन्त्य हुनेगरी विज्ञान र प्रविधिको प्रयोग गर्न जरुरी रहेको बताए ।