ललितपुरको सुनाकोठी बुदोकैदो क्लबद्वारा आयोजित ५औं राष्ट्रिय बुदोकैदो फुलकन्ट्याक्ट् कराँते प्रतियोगिता २०८० मा सुदूरपश्चिमका बुदोकैदो खेलाडीले १८ पदक जितेका छन् ।

कराँते प्रतियोगिता महिला र पुरुष गरी १३ वटा तौल समूहमा भएको थियो ।

प्रतिस्पर्धामा सुदूरपश्चिमले ७ वटा तौल समूहमा स्वर्ण पदक, ४ वटा रजत पदक, ३ वटा कास्य पदक तथा ४ वटा उत्कृष्ट गरी कूल १८ पदक हासिल गर्न सफल भएको छ ।

सुदूरपश्चिमअन्तर्गत कञ्चनपुरको शुक्लाफाँटा बुदोकैदो शाखाबाट सहभागी खेलाडीले १० पदक जितेका छन् ।

शुक्लाफाँटाबाट सहभागीमध्ये किरण भण्डारी २५ किलोग्राम तौल समूहमा प्रथम, राजेश जाग्री ३० किलोग्राम तौल समूहमा प्रथम र प्रकाश भण्डारी ५५ किलोग्राम तौल समूहमा प्रथम भएका छन् ।

यसैगरी भुवन विष्ट २५ किलो तौल समूहमा द्वितीय, सरस्वतीकुमारी बोहरा ४५ किलो तौल समूहमा द्वितीय, दिपेन्द्र एडी ३५ किलो तौल समूहमा द्वितीय र पूजा साउँद महिला खुलातर्फ द्वितीय भएका छन् ।

प्रतियोगितामा सहभागी रेखा भट्ट ४५ किलो तौल समूहमा तेस्रो भएकी छन् । यसैगरी प्रशान्त विष्ट ३५ किलो तौल समूह र जितेन्द्र विष्ट ४० किलो तौल समूहमा उत्कृष्ट खेलाडी भएका प्रशिक्षक लक्ष्मण बोहराले जानकारी दिए ।

शुक्लाफाँटा शाखाका खेलाडीले यसअघि पनि विभिन्न प्रतियोगितामा सहभागी भएर पदक जित्दै आएका छन् ।