प्रमुख प्रतिपक्षी दल नेकपा एमालेका अध्यक्ष केपी शर्मा ओलीले नेपालको समग्र हितको रक्षापछि मात्रै संसदको अवरोध हट्ने बताएका छन् । 

एमाले संसदीय दलका नेतासमेत रहेका ओलीले आइतवार बसेको प्रतिनिधि सभाको बैठक अवरोधपछि संसद् भवनबाहिर सञ्चारकर्मीहरूसँग कुरा गर्दै राष्ट्र, संविधान र भूमिको रक्षापछि मात्रै संसदको गतिरोध हटाउने बताएका हुन् ।

‘राष्ट्र, संविधान, भूमि र राष्ट्रिय स्वाभिमान र नेपालको समग्र हितको रक्षापछि मात्रै यो सेटल हुन्छ,’ उनले भने । 

प्रतिपक्षी दलहरूको विरोधका कारण आजको प्रतिनिधि सभा बैठक स्थगित भएको छ । एक घण्टाका लागि स्थगित भएको बैठक अहिलेसम्म (साढे ३ बजे) शुरू भएको छैन । 

नागरिकता विधेयक प्रमाणीकरणलगायत विषयको विरोधमा एमालेसहित राष्ट्रिय स्वतन्त्र पार्टी र राष्ट्रिय प्रजातन्त्र पार्टीले संसद् अवरोध गरेका थिए ।