निर्माण व्यवसायीहरूले आगामी असार ४ गतेभित्र सरकारले सबै आयोजनाहरूको म्याद थप नगरे निर्माणसम्बन्धि सबै कामहरू ठप्प पार्ने चेतावनी दिएका छन् । 

नेपाल निर्माण व्यवसायी महासंघले आइतवार काठमाडौंमा पत्रकार सम्मेलनगरी असार ४ गतेभित्र सबै आयोजनाहरूको म्याद थप नगरे निर्माणसम्बन्धि सबै कामहरू ठप्प पार्ने चेतावनी दिएको हो । 

प्रधानमन्त्री पुष्पकमल दाहाल, अर्थमन्त्री डा. प्रकाशशरण महतसँग पटक–पटक छलफल हुँदा गरिएको सहमतिअनुसार सबै आयोजनाहरूको म्याद थप असार ४ गतेभित्र नभए आफूहरू निर्माण कार्यनै ठप्प पारी आन्दोलनमा जान बाध्य हुने महासंघका अध्यक्ष रवि सिंहले चेतावनी दिए । 

उनले विगत लामो समयदेखि आफूहरूले राख्दै आएको माग पूरा हुनेगरी आगामी आर्थिक वर्षको बजेट नआएको भन्दै आपत्ति जनाए । अध्यक्ष सिंहले निर्माण उद्योग अर्थतन्त्रलाई चलायमान पार्ने उद्योगहरूको पनि उद्योग भएकाले माग सम्बोधन गरेर अघि बढ्न सरकारलाई खबरदारी गर्नु परेको स्पष्ट पारे । 

माग सम्बोधन नभए सबै इजाजत राज्यलाई बुझाएर आन्दोलनमा होमिन बाध्य हुने चेतावनी दिएको छ । 

‘हामीले धैर्यतापूर्वक नै सरकारसँग संवाद गरिरहेका छौं । प्रधानमन्त्री र अर्थमन्त्रीज्यूसँग धेरैपटक बस्यौं । यसलाई सम्बोधन गछौं भन्नुभएको थियो । बजेटमा समावेश गर्छौं भन्नुभएको थियो,' उनले भने, 'अहिले पनि हामी धैर्यतापूर्वक नै सरकारलाई खबरदारी गरिरहेका छौं । तर, हामी बाध्य पनि हुन सक्छौं । असार ४ गतेभित्र  म्याद थपको समस्यालाई सम्बोधन गर्नु पर्‍यो । म्याद थप भएन भने अब आउने वर्षमा पनि मुलुकले चाहेको पूर्वाधारको विकास हुँदैन ।’